Qëllohet për vdekje njeriu që dogji Kuranin në Suedi

Njeriu që nxiti protesta të dhunshme pas djegies së librit të shenjtë Kuranit, është qëlluar për vdekje në Suedi.

Salwan Momika, 38 vjeç, raportojnë mediat lokale, është vrarë në një apartament në Sodertalje të Stockholmit, pasditen e së mërkurës.

Ai nxiti trazira të mëdha pasi djegu një kopje të Kuranit jashtë xhamisë qendrore të Stockholmit më 2023.

Policia në Stockholm tha përmes një deklarate se pesë persona janë arrestuar pasi një burrë në të 40-at është qëlluar për vdekje përgjatë natës.

Mediat lokale kanë raportuar se Momika ishte kyçur drejtpërdrejt në rrjetet sociale rreth kohës kur është qëlluar.

Momika, irakian që ka jetuar në Suedi, është akuzuar në gusht, bashkë me një tjetër person, për “agjitacion kundër një grupi etnik”, në të paktën katër raste, në verën e vitit 2023.

Vendimi, që ishte paraparë të bëhej publik sot, është shtyrë pasi është konfirmuar se njëri prej të pandehurve ka vdekur, tha gjykata në Stockholm.

Momika ka organizuar disa herë protesta kundër Islamit, dhe kështu pati nxitur protesta në shumë shtete me shumicë myslimane.

Qeveria suedeze i kishte dhënë leje Momikas për protesta, në të cilat ka djegur librin e shenjtë, me arsyetimin se veprimet e tij janë në linjë me ligjet për liri të shprehjes.

Më vonë zyrtarët qeveritarë u shprehën se janë duke shqyrtuar mjete ligjore për moslejim të protestave në të cilat mund të digjen tekste./RFE/