Qetësohen tregjet globale të energjisë, fafta bie në 90 $ për fuçi

Çmimet e naftës në tregjet ndërkombëtare kanë rënë ndjeshëm, duke zbritur në rreth 90 dollarë për fuçi, pasi deklaratat e presidentit amerikan Donald Trump se lufta kundër Iran është “pothuajse e përfunduar” kanë qetësuar pjesërisht tregjet globale të energjisë.

Sipas raportimit të agjencisë Reuters, kontratat e naftës kishin kaluar më herët 100 dollarë për fuçi dhe madje kishin arritur deri pranë 120 dollarëve, niveli më i lartë që nga viti 2022, për shkak të frikës për ndërprerje të furnizimit nga Lindja e Mesme.

Megjithatë, çmimet ranë me shpejtësi pasi Trump deklaroi në një intervistë për CBS News se operacionet ushtarake kundër Iranit janë “shumë të avancuara dhe pothuajse të përfunduara”. “Mendoj se lufta është shumë e përfunduar, pothuajse. Ata nuk kanë më marinë, nuk kanë komunikime dhe nuk kanë forcë ajrore,” u shpreh ai.

Deklaratat e tij kanë ndikuar menjëherë në tregje, pasi investitorët kanë filluar të presin një ulje të rrezikut për furnizimin global me energji. Frika për një krizë të thellë energjetike ishte shtuar veçanërisht për shkak të tensioneve rreth Gjirit të Hormuz, një korridor strategjik nga i cili kalon rreth 20% e tregtisë botërore të naftës.

Pas rënies së çmimeve të naftës, edhe tregjet financiare reaguan pozitivisht, me indeksët kryesorë në Wall Street që rikuperuan humbjet e mëparshme, ndërsa investitorët vlerësuan se rreziku për një ndërprerje të madhe të furnizimit me naftë mund të jetë duke u zbutur.

Në ditët e fundit, konflikti në Lindjen e Mesme kishte shkaktuar një nga luhatjet më të forta në tregjet e energjisë në vitet e fundit, duke rritur shqetësimet për inflacion dhe për ndikimin në ekonominë globale./Monitor/