Qeveria akumulon për të shpenzuar në dhjetor gati gjysmën e investimeve kapitale prej 600 mln euro

Me ndryshimet e fundit në aktin normativ zëri i investimeve kapitale mbeti në nivelin 135 miliardë lekë ose rreth 1,2 miliardë euro, por deri në fund të periudhës 11 mujore ishte realizuar vetëm 53 për qind e kësaj vlerë.

Qeveria i ka lejuar vetës që të shpenzoje vetëm në një muaj 61.7 miliardë lekë ose 600 milionë euro, ose gati gjysmën e planit vjetor të investimeve, sipas të dhënave zyrtare nga Ministria e Financave.

Për 11 muaj qeveria ka shpenzuar 73,4 miliardë lekë dhe vetëm për një muaj do të shpenzojë 61.7 miliardë lekë. Përdorimi i gjysmës së zërit të investimeve kapitale vetëm në 30 ditë, vë në dyshim eficiencën e shpenzimeve dhe mund të krijojë disa zhbalancime makroekonomike, si psh ndikimet negative në inflacion.

Rregulli buxhetor kërkon që faturat e pagesave të jepen në bazë të situacioneve të punimeve, të cilat janë duke u paguar masivisht në muajt e fundit të vitit.

Pas ndryshimeve me dy akte normative aktualisht investimet kapitale për këtë vit janë në shumë 136,6 miliardë lekë nga 123,9 miliardë lek që ishte plani në fillim të vitit.

Pagesat buxhetore në ditët e fundit të vitit nisën të bëhen më agresive që nga viti 2021, ku Banka e Shqipërisë raportoi rritje jo të zakontë të depozitave të bizneseve në lek të krijuara nga pagesat e qeverisë.

Pagesat për investime publike, bonusi i pensionistëve dhe shpërblimet që jepen në fund vit edhe nga sektori privat favorizojnë rritjen e inflacionit ose në rastin e më të mirë pengojnë uljen e ritmeve të rritjes së çmimeve.

Ndërsa Shpenzimet e përgjithshme publike, për periudhën njëmbëdhjetë mujore të vitit 2023, arritën në rreth 548.6 miliardë lekë, mbeten për tu shpenzuar edhe 156 miliardë lekë sipas planit në dhjetor ose rreth 23 % e buxhetit. Krahasuar me të njëjtën periudhë të vitit 2022 ky zë ka rezultuar 6.8 për qind më i lartë ose rreth 34.9 miliardë lekë më shumë.

Në terma vjetorë, shpenzimet e përgjithshme për periudhën 11 mujore të vitit 2023 u realizuan në masën 78.6 për qind të planit vjetor sipas buxhetit fillestar dhe 77.7% te planit vjetor sipas Aktit Normativ nr. 5 datë 18.10.2023 (AN nr. 5).

Shpenzimet korente për periudhën 11 mujore të vitit 2023 rezultuan në rreth 475 miliardë lekë ndërsa krahasuar me të njëjtën periudhë të një viti më parë ky zë ka rezultuar 11.3 për qind më i lartë ose rreth 48.3 miliardë lekë më shumë./Monitor/