Qeveria dhe KFOR-i të koordinuar për sigurinë në Kosovë

Duke uruar për detyrën e re dhe pas mirëseardhjes në Kosovë, Kryeministri Albin Kurti e informoi sot në një takim komandantin e ri të KFOR-it, Gjeneralmajor Angelo Michele Ristuccia, për zhvillimet në vend, punën e qeverisë dhe synimet e saj, me theks te fusha e sigurisë.

Gjeneralmajor Ristuccia nga ana e tij shprehu përkushtimin dhe gatishmërinë e tij për bashkëpunim dhe koordinim me Qeverinë e Kosovës dhe institucionet vartëse të sigurisë dhe rendit në shërbim të sigurisë, paqes dhe garantimit të lirisë së lëvizjes, thuhet në njoftimin e Zyrës së Kryeministrit.

Ndryshe, Gjeneralmajor Angelo Michele Ristuccia mori komandën e KFOR-it më 10 tetor. Ai është oficeri i 13-të italian që merr komandën, si Komanda e 27-të e KFOR-it.