Qeveria e Bullgarisë i mbijeton sërish votëbesimit

Qeveria e kryeministrit bullgar, Boyko Borisov i ka mbijetuar votëbesimit të thirrur nga opozita, për shkak të mungesës së ujit, që i ka kushtuar me postin e ministrit të Ambientit, Neno Dimov.

Vetëm 102 deputetë nga 240 sa janë në Parlamentin e Bullgarisë kanë votuar sot për rrëzimin e qeverisë derisa 124 të tjerë kanë qenë kundër.

Kjo ka qenë përpjekja e katërt e këtij lloji për ndërrim të qeverisë në Bullgari, prej kur është formuar më 2017.

Dimov ka dhënë dorëheqje nga pozita e tij si ministër i Ambientit më 10 janar dhe është akuzuar për keqmenaxhim të rezervave të ujit në rajonin perëndimor të këtij shteti, raporton RFE.

Prokurorët akuzojnë atë se ka ofruar rezerva të ujit për kompani industriale edhe kur është informuar se niveli i ujit në digën në qytetin Pernik ka rënë dukshëm, ndonëse ai është burimi i vetëm i ujit në atë zonë.

Dimov, që rrezikon të përballet me tetë vjet burgim ka mohuar ndonjë keqbërje dhe ka arsyetuar krizën e ujit me motin e thatë dhe menaxhimin e keq të hapësirave lokale ujore.