Qeveria e Kosovës, 100 mijë euro për Preshevën e përmbytur

Qeveria e Kosovës ka ndarë 100 mijë euro për mbulimin e dëmeve nga përmbyjtet në komunën e Preshevës.

Ministri i Financave, Punës dhe Transfereve Hekuran Murati, para miratimit nga Qeveria sqaroi.

“Parashikohet që të ndahen 100 mijë euro dhe këto mjete nuk e mbulon tërësishëm dëmin, por është solidarizim me vëllezërit tanë,” tha Murati.

Ky vendim i Qeverisë së Kosovës, vjen pas takimit që Kryeministri Albin Kurti zhvilloi me kryetaren e Komunës së Preshevës, Ardita Sinani, kryetarin e Komunës së Bujanocit, Nagip Arifi dhe këshilltarin komunal të Medvegjës, Fehmi Beha, ku Kryetarja e Preshevës e njoftoi kryeministrin Kurti me gjendjen e përkeqësuar në Preshevë e rrethinë, si pasojë e përmbytjeve të muajit të kaluar që shkaktuan dëme materiale në vlerë prej 325 mijë euro.

Ndryshe, në takim me liderët e Luginës së Preshevës, Kryeministri Kurti bisedoi edhe për çështjen e të drejtave të shqiptarëve në këto tri vendbanime dhe në viset e tjera në Serbi.

Me këtë rast kryetarja e Komunës së Preshevës, Ardita Sinani, theksoi problemin që kanë shqiptarët e kësaj komune me mungesën e investimeve dhe kushtëzimet e pengesat që u bën pushteti i Beogradit investitorëve të huaj që shprehin interesim që të investojnë në këtë vendbanim shqiptar.

Ndërsa Kryetari i Komunës së Bujanocit foli për problemet e qarkullimit të lirë të shqiptarëve në pikat kufitare të Kosovës me Serbinë, si dhe pasojat e mosnjohjes së diplomave të Kosovës. E këshilltari në Komunën e Medvegjës, Fehmi Beha, foli për metodën e heshtur dhe të rrezikshme të diskriminimit që po u bën pushteti shqiptarëve të kësaj komune, me pasivizimin e adresave, duke i lënë kështu qindra shqiptarë pa dokumentacion as të Serbisë e as të Kosovës.

Në takim u diskutua edhe për takimin e 15 qershorit në Bruksel, për të cilin kryeministri Kurti tha se ishte takim për dialogun e ardhshëm ndërmjet Kosovës dhe Serbisë mbi statusin e marrëdhënieve ndërmjet dy shteteve.

Kryeministri tha se në procesin e dialogut të ri do të angazhohet për reciprocitet të drejtash të pakicave kombëtare në Kosovë e në Serbi.   

Takimi i kryeministrit Albin Kurti me përfaqësuesit politikë të Preshevës, Medvegjës e Bujanocit është në vazhdën e takimeve për ruajtjen e marrëdhënieve të mira dhe bashkëpunimit institucional për mbrojtjen dhe avancimin e të drejtave të shqiptarëve.