Qeveria e Kosovës angazhohet për sundimin e ligjit, BE mbron kriminelët serb në Veri
Bashkimi Evropian ende pa mbajtur qëndrim mbi agresionin e shtetit serb ndaj Kosovës 11 muaj më parë ndërsa vazhdojnë të jenë në fuqi masat ndaj Kosovës por jo agresorit, nxiton për të qetësuar presidentin e Serbisë, Aleksandar Vuçiç, i cili i acaruar për mbylljen e pikave të Postës së Serbe në veri dhe hapjen e Urës mbi lumin Ibër në Mitrovicë kërcënoi me luftë Kosovën ndonëse mbrohet nga Aleanca Politiko-Ushtarake, NATO!
Në vërejtjen e Prishtinës zyrtare se nuk po i kundërshton askush këto vendime përveç Beogradit zyrtar, në mungesë të Radoiçiçit dje Vuçiç nxori serbët për të protestuar në veri kundër lirisë së lëvizjes sepse nuk e duan hapjen e urës mbi lumin Ibër.
Dhe, menjëherë sot, deri sa Qeveria e Kosovës vazhdon të angazhohet për sundimin e ligjit në veri, Bashkimi Evropian nxori zëdhënësin e tij Peter Stano që të kërcënoi me masa shtesë ndaj Kosovës sepse i vendimet e Qeverisë Kurti i konsideron si të pakoordinuara.
“Masat u vendosën vjet për faktin se shumëçka po ndodhte që çonte në përshkallëzim dhe në vend të hapave që çonin në uljen e tensioneve, janë ndërmarrë shumë e më shumë hapa dhe vendime të njëanshme që çojnë drejt përshkallëzimit. Ne e kemi thënë atëherë se këto masa janë progresive, mund të ashpërsohen apo lehtësohen varësisht zhvillimeve të situatës. Pra, çfarë do të bëjmë? Kemi masa në fuqi dhe këto masa mund të shtohen nëse akterët evropianë pajtohen se ato duhet të shtohen,” tha Peter Stano duke shpresuar se Qeveria e Kosovës do ta marrë mesazhin dhe nuk do të angazhohet për sundimin e ligjit në veri duke frenuar kështu BE-në që të mos marrë në konsideratë shtimin e masave.
“Ua kemi bërë të qartë qëndrimin tonë Kosovës, në shumë nivele, në shumë mënyra dhe përmes shumë partnerëve. Nuk është vetëm BE-ja, të gjithë partnerët ndërkombëtarë të Kosovës po i thonë Qeverisë në Prishtinë që të mos angazhohet në këto seri hapash të pakoordinuar, negativ dhe të njëanshëm. Shpresojmë se më në fund do ta dëgjojnë mesazhin dhe do të na ndalojnë të shqyrtojmë se çfarë masa do të konsiderojmë të marrim nëse situata nuk ndryshon.”
Ndryshe, 13 muaj nga paralajmërimi Kryetares së Komisionit të Punëve të Jashtme pranë Parlamentit të Mbretërisë së Bashkuar, deputetes britanike, Alicia Kearns, se armët po kontrabandohen nga Serbia në Kosovë përmes autoambulancave dhe po shkarkohen në kishat ortodokse, 11 muaj pasi këto armë u përdorën nga kriminelët serb për të sulmuar Kosovën, si dhe 10 muaj pasi krimineli serb Milan Radoiçiç pranoi fajësinë për sulmin në Banjskë dhe vazhdon të jetë i lirë në Serbi, Bashkimi Evropian i Peter Stanos përveç se nuk ndëshkon shtetin serb planifikon masa shtesë për viktimën, Kosovën e Afrim Bunjakut; I cili mbeti i vrarë sepse regjimenti ushtarak britanik në kuadër të misionit të KFOR-it u pengua të konfiskojë armët e kontrabanduara nga Serbia në kishat ortodokse serbe me autoambulanca, dhe paralajmërimi i Alicia Kearns u shpërfill!
