Qeveria e Kosovës: Kryeministri Rama anuloi mbledhjen në mënyrë të njëanshme!

Pas anulimit të mbledhjes së dy qeverive Shqipëri-Kosovë të paraparë për nesër në Gjakovë nga ana e Kryeministrit Edi Rama, ka reaguar Qeveria e Kosovës duke sqaruar se kjo mbledhje u anulua njëanshëm ndërsa për takimet dypalëshe që i ka kërkuar Rama thekson se ato do të mund të zhvillohen çdo ditë tjetër.

“Mbledhjet e përbashkëta janë ndërmarrje të madhe organizative, të cilave u paraprinë një punë e madhe e ministrive për të përgatitur atë ditë. Nesër do të duhej të nënshkrueshin 13 marrëveshje të reja. Ato kishin synim t’i afronin ekonomitë tona, sistemet tona të drejtësisë, arsimit, kulturës, etj. Janë qytetarët ata që do humbasin më së shumti.

Për fat të keq, anulimi i mbledhjes nga ana e kryeministrit Rama anuloi mundësinë për t’i nënshkruar ato. Takimet bilaterale do të mund të mbaheshin çdo ditë tjetër. Jemi fare afër njëri-tjetrit si vende. Nuk do të ishte hera parë që do të takoheshim brenda ditës. Por është hera parë që një mbledhje e përbashkët anulohet në mënyrë të njëanshme,” thuhet në reagimin e Qeverisë pas komunikimit nga Kryeministri Edi Rama të anulimit të mbledhjes së përbashkët Shqipëri-Kosovë!

Ndryshe, Kryeministri Edi Rama tha se vendimin për anulimin e mbledhjes së përbashkët të dy qeverive e mori pas një bisede që zhvilloi me shefin e diplomacisë evropiane, Josep Borrell, duke paralajmëruar se bashkësia euroatlantike ka vënë gishtin në butonin që do vërë në lëvizje planin e sanksioneve ndaj shtetit që e ka krijuar vetë.