Qeveria e Kosovës miraton Projektligjet për Sigurimet Shëndetësore dhe Çmimet Tavan
Qeveria e Kosovës ka miratuar sot dy projektligje, atë për Sigurimin e Detyrueshëm të Kujdesit Shëndetësor dhe për Çmimet Tavan.
Kryeministri, Albin Kurti tha se risollën në ekzekutiv për miratim dy nga projektligjet që ishte sfiduar në Kushtetuese nga opozita kohë më parë.
“Synimi ynë për të investuar në shërbime shëndetësore dhe për të garantuar sigurim publik shëndetësor me qëllim përmirësimin e cilësisë së jetës do të konkretizohet me miratimin e Projektligjit për Sigurim Shëndetësor. Përmes tij, synojmë që njerëzit në nevojë të kenë mbrojtje më të mirë sociale duke ndikuar në uljen e varfërisë e pabarazive,” tha Albin Kurti duke shtuar se Projektligjin për Sigurimin e Detyrueshëm të Kujdesit Shëndetësor krijon edhe një mekanizëm të drejt solidariteti shoqëror, ku secili kontribuon sipas mundësisë e përfiton sipas nevojës.
“Duke e bërë sistemin më gjithëpërfshirës e më të drejt, vendos themelet për një financim të qëndrueshëm të shëndetësisë. Ky është një hap i rëndësishëm drejt modernizimit shëndetësor dhe përmirësimit të standardeve të trajtimit. Kjo reformë e bën shtetin më të fortë në përmbushjen e detyrimit themelor, mbrojtjen e jetës dhe mirëqenien e qytetarëve”.
Ndërsa Ministri Arben Vitia tha se kjo është një nga iniciativat më të rëndësishme për të ardhmen e shëndetësisë.
“Ky projektligj vjen pas një periudhe të gjatë diskutimesh. Janë analizuar me kujdes sfidat dhe mangësitë që ka sistemi ynë shëndetësor, janë studiuar edhe praktikat ndërkombëtare për të krijuar një ligj që i përgjigjet nevojave të qytetarëve tanë e që është i zbatueshëm për realitetin tonë ekonomik, por edhe social. Pas mbi 10 vite përpjekjesh, projektligji përfaqëson një hap të rëndësishëm drejt krijimit të një sistemi të qëndrueshëm e gjithëpërfshirës të sigurimeve shëndetësore,” tha ministri i Shëndetësisë, Arben Vitia, gjatë prezantimit të tij në mbledhjen e Qeverisë.
Projektligji për Çmimet Tavan, Kurti:Po mbrojmë lirinë e tregut nga abuzimi
Qeveria e Kosovës sërish i ka dhënë dritë jeshile edhe Projektligjit për Çmimet Tavan, i cili më herët nga Gjykata Kushtetuese ishte shpallur i pavlefshëm, pasi ishte sfiduar atje nga partitë opozitare.
Kryeministri, Albin Kurti tha se në mandatin e kaluar krahas përgjigjeve me pako për përballje me inflacionin si masë urgjente, kishin nisur edhe iniciativën për krijimin e Ligjit për Çmimet Tavan, kjo sipas tij, jo për të penguar rritjen e zhvillimit të askujt, por për të evituar, siç tha, keqpërdorimet apo fryrjen artificiale të çmimeve.
“Por ngjashëm sikurse shumë iniciativa të tjera edhe ky ligj u pat sfiduar pas aprovimit në Kuvend, në Gjykatën Kushtetuese nga ana e opozitës. Dhe ja ku jemi shumë e shumë muaj pas me kriza të reja në sfond global që tash këto kriza e prekin edhe xhepin e qytetarëve tanë,” tha Albin Kurti dhe ky projektligji vjen si përgjigje e domosdoshme ndaj një realiteti e përvoje që qytetarët thotë se e kanë përjetuar.
“Rritje të papritura të çmimeve, paqartësi në treg dhe mungesë e mekanizmave efektiv për mbrojtje e ruajtje. Me këtë ligj nuk po ndërhyjmë në tregun e lirë, por përkundrazi po e mbrojmë lirinë e tregut nga abuzimi. Ky projektligj vendosë një balancë të domosdoshme ndërmjet funksionimit të lirë të tregut dhe përgjegjësisë së shtetet për të mbrojtur interesin publik në situata të jashtëzakonshme. Krijimin e instrumenteve të qarta për ndërhyrje të përkohshme, të targetuara dhe të bazuara në evidencë, në fakte, duke shmangur deformimet afatgjate të tregut,” tha Kryeministri Kurti i bindur se ky ligj garanton furnizimin dhe çmime të përballueshme për produkte bazë në kohë krize, parandalon spekulime dhe fitime të pajustifikuara në kurriz të qytetarëve dhe siguron reagim të shpejt institucional kur tregu destabilizohet.
Ministrja e Industrisë, Ndërmarrësisë, Tregtisë dhe Inovacionit, Mimoza Kusari Lila, tha se ky projektligj ka për qëllim të përcaktojë kornizën ligjore për vendosjen e masave të përkohshme proporcionale për produktet themelore në raste të veçanta të destabilizimit të tregut ndërsa përfundoi:
“Me synim mbrojtjen e konsumatorit dhe interesit publik, si dhe vendosjen e një mekanizmi të ri të pavarur institucional dhe procedural për menaxhimin e situatave që vijnë si rezultat i luhatjeve të theksuara të çmimeve në treg.”
