Qeveria e Kosovës miraton projektligjin për buxhetin e vitit 2020

Qeveria e Kosovës në mbledhjen e sotme ka votuar projektligjin për buxhetin e vitit 2020. Të gjitha shpenzimet buxhetore për këtë vit do të jenë 2 miliardë e 357 milionë euro.

Ministri i Financave dhe Transfereve, Besnik Bislimi tha se me anë të këtij buxheti do të ketë rritje ekonomike prej 4.2 përqind. Krahas kësaj, ai tha se ka rritje në të hyrat e buxhetit.

Në kuadër të kësaj, Bislimi u shpreh se kanë rishikuar të gjithë pjesën e investimeve kapitale dhe sipas tij ka një rritje rreth 100 milionë euro për këtë pjesë. Por, tha se do të ketë rishikim të buxhetit në muaj të ardhshëm për ballafaqim të sfidave që dalin, përshirë Ligjin për paga.

“Fokusi ynë ka qenë akomodimi për projektet dhe iniciativat të përdoren në mënyrën më të mirë të mundshme. Rritje ekonomike sipas parashikimeve këtë vit do të jetë 4.2 përqind, apo mbi 5% në kontekstin maksimal. Të hyrat mbi 2 miliardë kemi një rritje prej 7 përqind. Kjo rritje vjen nga të hyrët tatimore. Kjo rritje është më e lartë se norma ekonomike. Kemi rishikuar edhe pjesën e projekteve kapitale. Shpenzimet buxhetore janë 2 miliardë e 357 milionë euro. Te investimet kapitale kemi një rritje prej 140 milionë euro”, tha ai.

Bislimi shprehu shqetësimin e tij për koronavirusin që mund të prodhojë në ekonomi.

Në lidhje me këtë edhe disa ministra të dikastereve të ndryshme kërkuan që të akomodohen kërkesat e tyre. Ky projektligj do t’i dërgohet Kuvendit për miratim dhe amendamentim.