Qeveria e Kosovës ndanë katër milionë euro për pagat e minatorëve të Trepçës

Qeveria e Kosovës sot ka ndarë katër milionë euro për pagat e minatorëve të Trepçës, të cilët kanë mbetur pa i marrë ato tash e tre muaj.

“Për ndërmarrjen publike Trepça do të ndajmë katër milionë euro dedikuar për mbështetje të Trepcës, në mënyrë që të tejkalohet kriza aktuale. Ndërmarrja nuk ka arritur t’i sigurojë pagat nga xehja e nxjerrë. Duket se ka tepër shumë punëtorë mbi tokë për xehet e pakta të nxjerra nga toka,” tha Kryeministri Albin Kurti sot në mbledhjen e Qeverisë së Kosovës.

Që nga fillimi i muajit korrik, punëtorët e kësaj ndërmarrjeje e kanë ndërprerë punën, për shkak se nuk u janë paguar pagat për muajt qershor dhe korrik, ndërkohë Sindikata e Punëtorëve të Trepçës që kishte paralajmëruar protestë për 14 gusht, e konsideron të mjaftueshme si fillim ndarjen e këtyre mjeteve për ta tejkaluar krizën dhe për rifillimin e punës.

Ndërsa Menaxhmenti i Trepçës, që më 31 korrik e ka arsyetuar mosekzekutimin e pagave me mungesë të mjeteve financiare dhe rënie të prodhimit. Në një situatë të ngjashme, minatorët e Trepçës e kanë gjetur veten disa herë edhe gjatë vitit të kaluar.

Ndryshe, Kompleksi metalurgjik Trepça është shoqëri aksionare ku 80 për qind e aksioneve janë të Qeverisë së Kosovës, kurse 20 për qind janë të punonjësve të kësaj ndërmarrjeje.

Në Trepçë punojnë gjithsej 1.200 minatorë, derisa paga mesatare e tyre është 740 euro.