Qeveria e Kosovës, nga 100 euro për fëmijët e pensionistët për këtë fundvit

Qeveria e Kosovës sot ka vendosur që të subvencionoj fëmijët dhe pensionistët me nga 100 euro për këtë fundvit.

Ministri i Financave, Hekuran Murati, ka bërë të ditur se të gjithë fëmijët që janë përfitues të skemave aktualisht do të përfitojnë nga 100 euro gjatë ditëve në vijim. 

“Prindërit nuk kanë nevojë për aplikim, pasi mjetet do të kalojnë në xhirollogarinë e tyre,” tha Ministri Murati duke saktësuar se pensionistët shtesën prej 100 euro do ta marrin gjatë javës në vijim, pasi pensioni i rregullt del të premten dhe ishte e pamundur që shtesën ta bashkëngjesin me pensionin e rregullt.

Nga 100 euro për fëmijët dhe pensionistët

Në mbledhjen e Qeverisë së Kosovës, kryeministri i Kosovës, Albin Kurti, ka thënë se këtë vit, secili fëmijë dhe pensionistë do të përfitojë nga 100 euro si mbështetje.

Kryeministri Kurti, tha se këtë vit nuk janë harruar as pensionistët dhe se do të ketë sot një vendim tjetër.

“Për të gjithë pensionmarrësit këtë fundvit me qëllim të lehtësimit të kostos së jetesës për këtë kategori të cenueshme do të miratojmë shtesën e njëhershme prej 100 euro, përveç pensionit të rregullt mujor që marrin.”

Kurti: Jemi të shqetësuar me rezultatet e testit PISA

Në mbledhjen e qeverisë, Kryeministri Albin Kurti duke fol edhe për rangimin e Kosovës në testin PISA, shprehu shqetësimin si për rezultatin ashtu dhe motivimin e nxënësve për mësim.

“Jemi të shqetësuar me rezultatet e testit PISA për vendin tonë, të cilat treguan për defekte strukturore e kronike të sistemit arsimor që shtrihen gjatë në të kaluarën e shoqërisë sonë dhe nuk do të mund të rregullohen përnjëherë e shpejt. Mësimdhënësit duhet të kujdesen që të motivojnë, inspirojnë e garantojnë që nxënësit po mësojnë e dinë,” tha  Albin Kurti duke shtuar se si qeveri e re e një vendi të ri dhe me popullatë të re, janë të përkushtuar për rininë.

Qeveria e ka miruatuar dhe një vendim për themelimin e Mekanizmit të Parlajmërimit të Hershëm për Monitorimin e Trendeve të Migrimit. Ky mekanizëm, tha Kurti, do t’i monitorojë lëvizjet e migrimit pas liberalizimit të vizave ndërsa përfundoi:

“Ky mekanizëm ndërinstitucional ka për qëllim të monitorojë trendet e lëvizjeve të migrimit pas liberalizimit të vizave nga Bashkimi Europian, të mbledh dhe të analizojë të dhëna lidhur me lëvizjet e shtetasve të Republikës së Kosovës në shtetet e zonës Schengen, si dhe të rekomandojë ndërmarrjen e masave për institucionet relevante me qëllim të menaxhimit të suksesshëm të procesit.”

Ndërkohë Kryeministri Albin Kurti në mbledhjen e sotme të qeverisë bëri të ditur se janë ndarë dhe mjetet shtesë për buxhetin e Forcës së Sigurisë së Kosovës me vlerë prej 40 milionë euro.