Qeveria e Kosovës, pensionet rriten 20%

Kryeministri i Kosovës Albin Kurti, ka bërë të ditur se nga ky muaj do të rriten pensionet për 20 për qind. Ndërkohë nga janari i vitit që vjen pensionet do të rriten po me kaq përqindje edhe për kategoritë e përcaktuara me Ligjin për kategoritë e luftës.

Ndërkohë Kryeministri i Kosovës ka bërë të ditur edhe një lajm të mirë, por, për biznesin e Serbisë, do të lejohet importi i mallërave përmes pikës kufitare Merdare ndërsa nga pikat tjera, sapo të pajisen me skanerë.

Me këtë rast, Albin Karti sqaroi se cilat pensione do të rriten.

“Nga ky muaj, pra nga muaji tetor do të rriten për 20 për qind pension bazik i moshës, pensioni kontribut pagues i plotë dhe parcial, pensioni i aftësisë së kufizuar për fëmijë dhe të rritur, pensioni për personat e verbër, pensioni për personat  papraplegjik e tetraplegjik, pensioni familjar, pensioni invalidor i punës dhe pensioni i parakohshëm për punëtorët e Trepçës,” tha Kurti duke shtuar se rritje pensionesh do të ketë edhe për kategoritë e luftës, por nga muaji janar sepse duhet ndryshohet tabela që është pjesë e ligjit si shtojcë.

“Nga muaji janar 2025 do të rriten për 20 për qind pensionet e përcaktuara me Ligjin për Kategoritë e Luftës, përkatësisht familjet e dëshmorëve, invalidëve, veteranëve, pjesëtarëve të UÇK-së, viktimave të dhunës seksuale të luftës, viktimave civile dhe familjarëve të tyre, kjo për arsyen se për ndryshimin e këtyre pensioneve duhet të ndryshohet edhe tabela që është pjesë e ligjit si shtojcë”.

Por, kryeministri ka treguar se te këto kategori për familjet e dëshmorëve të UÇK-së dhe të të zhdukurve të UÇK-së që kanë më shumë se një dëshmor ose të zhdukur do të ndryshohet edhe formula e pensionit, duke e rritur atë për 50 për qind të pensionit bazë për çdo dëshmorë apo të zhdukur tjetër që ka familja e jo siç shpjegoi  të rritet me nga 20 për qind apo 10 për qind si ka qenë deri tani.

“E njëjta formulë do të përdoret edhe për familjet e viktimave dhe të zhdukurve civil ku për çdo viktimë apo të zhdukur tjetër që ka familja, pensioni do të rritet për 50 për qind të pensionit bazë.”

Kurti konfirmon ndryshimin e masës për importet nga Serbia

Por një lajm të mirë, Kryeministri i Kosovës Albin Kurti, kishte edhe për biznesin e Serbisë, lejimin e importit të mallërave serbe. Në gjuhën politike, Kurti foli për ndryshim të masës së sigurisë nga kufizim në kontroll të shtuar, por vetëm në pikën kufitare Merdare deri në paisjen e të gjitha pikave me skaner.

Kryeministri Kurti tha se në shtatë ditët e ardhshme do të jenë dy zhvillime të rëndësishme siç është mbledhja e CEFTA-s dhe Procesi i Berlinit.

I pyetur nëse për ndryshimin e kësaj mase është koordinuar me qeverinë gjermane e cila ka kërkuar heqjen e plotë të masave ndaj mallrave serbe, Kurti është shprehur i bindur se ndryshimi i masës do të sjellë sukses të plotë edhe në CEFTA edhe në Procesin e Berlinit.

“Le ta ritheksojmë që masat tona nuk kanë qenë e nuk janë asnjëherë tregtare, janë masa të sigurisë. Në 2 vitet e fundit Serbia ka sjellë 4 herë ushtrinë e saj te kufiri i Kosovës. Vitin e kaluar e këtë vit kemi pasur 4 konfiskime të mëdha të armatimit dhe të municionit, ndërkohë që grupi paramilitar terrorist që vrau rreshterin e policisë, Afrim Bunjaku vazhdon të jetë i lirë në Serbi. Nëpërmjet rrugëve të ndryshme mund të kenë qenë jo vetëm ilegale nëse kanë hyrë mallra të gatshme nga Serbia e ne nuk i kemi hapur ato dhe ne nuk mund të përjashtojmë që diçka edhe përvidhet. Kjo i ndodhë  edhe Shteteve të Bashkuara edhe vetë Gjermanisë,” tha Albin Kurti duke treguar se në Hamburg kishte parë skaner statik dhe mobil.

“Në një nga pikat kufitare ne po e bëjmë këtë ndryshim të masës sipas letrës që ia ka dërguar Drejtorit të Doganave,  Ministri i Punëve të Brendshme. Ai është marr me këtë punë. Por, me këtë punë është marr gjithë qeveria, prej meje, e sidomos zëvendëskryeministri  deri te këshilltarët e mi. Këta kanë biseduar e negociuar edhe me BE-në e në veçanti me Gjermaninë,  e ndryshimi i masës që e bëjmë që pasnesër në CEFTA e të hënën në Procesin e Berlinit të kemi sukses të plotë.”