Qeveria e mbështet Federatën e Xhudos me 143 mijë euro

Qeveria e Kosovës në mbledhjen e sotme ka marrë vendim që ta mbështesë Federatën e Xhudos së Kosovës me mjete financiare.

Në fakt, ka kohë që drejtuesit e Federatës së Xhudos së Kosovësdhe, veçanërisht trajneri më i suksesshëm në sportin kosovar, Driton Kuka, ka kërkuar nga institucionet e vendit që ta përkrahin xhudon, sidomos në aspektin e infrastrukturës, në mënyrë që të vazhdohet me ritmin e sukseseve në arenën ndërkombëtare.

“Në bazë të kërkesës së Federatës së Xhudos së Kosovës për mbështetje financiare, Qeveria e Kosovës ka miratuar vendimin që të ndajë mjete për renovimin e palestrës sportive në të cilën Federata është duke zhvilluar përgatitjet për pjesëmarrje në Lojërat Olimpike si dhe për të siguruar kushtet e transportit për xhudistët. Shuma e mjeteve të ndara është 143 mijë euro”, thuhet në njoftimin e Ekzekutivit.

Xhudo është sporti që i ka sjellë sukseset më të mëdha deri më tash Kosovës, por kushtet në të cilat punojnë kampionia olimpike, Majlinda Kelmendi dhe xhudistet tjera medaliste janë tejet të pavolitshme.

Këtij vendimi i është gëzuar Driton Kuka, i cili ka reaguar menjëherë nëpërmjet një postimi në profilin e tij në Facebook. “Kryeministri Haradinaj po e kthen dinjitetin edhe te ekipi Olimpik! Kampionja Olimpike por edhe të tjerët fal përkrahjes së sotme të kërkesave tona në mbledhjen e Qeverisë do stërvisin në kushte normale për stërvitje!
Ne si gjithmonë do punojmë për suksese të reja drejt Lojërave Olimpike Tokyo 2020!”, ka shkruar Kuka.