Qeveria e re e Kosovës miraton Buxhetin 2026 dhe marrëveshjet ndërkombëtare
Qeveria e Kosovës sot në mbledhjen e parë ka riproceduar në Parlamentin projektligjin për buxhetin e vitit 2026. Kryeministri Albin Kurti tha se vlera e buxhetit është 4 miliardë euro.
Që në fjalën e hyjes, Kryeministri Albin Kurti, e bëri të qartë se sot do të miratojnë marrëveshjet ndërkombëtare si dhe do të riprocedojnë në Parlament Projektligjin e Buxhetit.
“Mësimet që kemi nxjerr gjatë mandatit të kaluar se bashku me ekspertizën dhe dijet tuaja më bëjnë të besoj se ky kabinet i ka të gjitha parakushtet të jetë kabineti më i mirë. Jemi mbledhur qysh në ditën e parë të punës për të miratuar marrëveshjet ndërkombëtare që kanë qenë në pritje,” tha Albin Kurti duke bërë me dije se sot po riprocedohet në Parlament edhe Projektligji i Buxhetit.
“Është buxhet me vlerë 4 miliardë euro, 867 milionë parashihen për komunat. Buxheti përmban edhe pagën e 13-të e cila do të paguhet sapo të hyjë në fuqi Ligji për Buxhetin. Buxheti mundëson edhe rritjen e shtesës për përvojën e punës”, ka deklaruar ai.
Murati: Sumë shpejt do ta kemi edhe seancën për leximin e parë
Ministri i Financave, Hekuran Murati, tha se shumë shpejt do ta kemi edhe seancën për leximin e parë
“Sot ishte mbledhje e thirrur në mënyrë urgjente që të procedohen marrëveshjet dhe buxheti. Sot ishin disa pika të rëndësishme, kryesisht financiare. Plani i rritjes me BE-në, miratimi i kredisë me Bankën Botërore, dhe dy marrëveshje tjera me Bankën Botërore, për arsim dhe shëndetësi. Shumë shpejt do ta kemi edhe seancën për leximin e parë dhe besoj që javën tjetër duhet të bëhet edhe leximi i dytë,” tha Ministri i Financave, Hekuran Murati, duke përfundiar:
“Kemi marrëveshje që kanë pasur afat skadence, është dashur që ta shfrytëzojmë këtë mbledhje. Në mbledhjet e radhës do ti sjellim edhe vendimet tjera,” . Shpresoj që sot të bëhet miratimi i marrëveshjeve ndërkombëtare dhe ai i buxhetit.”
Ndryshe, Qeveria e Kosovës ka thirrur mbledhjen e parë, vetëm një ditë pas konstituimit të Parlamentit të Kosovës dhe formimit të saj.
Me këtë rast, Kryeministri Albin Kurti tha se nga nesër është i gatshëm të filloj diskutimet me partitë politike për çështjen e Presidentit të Kosovës.
