Qeveria e re e Serbisë betohet se do ta ruaj Kosovën në kuadër të shtetit serb!
“Betohem për përkushtim dhe me nderin tim obligohem se do të respektoj Kushtetutën e Republikës së Serbisë, se do ta kryej me ndërgjegje detyrën e anëtarit të Qeverisë, me përgjegjësi do të përkushtohem në ruajtjen e Kosovës në kuadër të Serbisë,” ishte ky betimi i anëtarëve të Qeverisë së re të Serbisë pasi u votua nga 157 deputetë, 68 ishin kundër, abstenime nuk kishte ndërsa munguan në seancë 25 deputetë.
Qeveria e 17 e Republikës së Serbisë, u votua gjashtë muaj pas zgjedhjeve parlamentare dhe një debati të ashpër ndonëse në një parlament që kontrollohet nga një njeri i vetëm, Presidenti Aleksandar Vuçiç, i cili dha mesazhe të qarta për mbështetje ndaj Rusisë dhe Putinit dhe kundërshtim ndaj Bashkimit Evropian dhe SHBA, duke bërë përjashtime dhe konkrete.
Në qeverinë e re nuk do të jetë ministrja me shumë ndikimin e Energjetikës, Zorana Mihajloviç vetëm pse kërkoi distancim nga politika ruse dhe mbështetje për Ukrainën, ashtu dhe ministri i Drejtësisë, Mbrojtjes dhe Punëve të Brendshme, Nebojsha Stefanoviç, i cili nuk u përfshi në qeverinë e re pasi u përafrua me politikën amerikane dhe Ambasadorin e SHBA në Beograd; Ndërkohë Aleksandar Vulin si altoparlanti kryesor i Rusisë në Serbi, sot ndonëse nuk u përfshi në qeveri, nga ministria e Brendshme ai do të kaloj në krye të Shërbimit Sekret të Serbisë, BIA
Në seancën e cila për nga fjalimet qeveritare më shumë i ngjante një tubimi kishtar se një seance parlamentare ku do të votohet qeveria e një shteti, vend kryesor si në betimin e ministrave zuri “Kosova në kuadër të Serbisë” ndonëse Serbia me Aleksandar Vuçiçin zhvillojnë negociata për më shumë se 20 vjet për statusin e Kosovës ndërsa Vuçiç ishte i gatshëm me Thaçin të shkëmbej edhe territore!
Kryeministrja formale e Serbisë, Ana Brnabiç në fjalën e saj para votimit tha se qeveria e re është qepur sipas masave të Serbisë dhe jo dëshirat e ambasadorëve dhe oligarkëve, se kandidatët për ministra janë të gatshëm që të përballen me problemet në këto kohë të vështira. Brnabiç ashtu sikur se shefi i saj nuk harroi të akuzoi opozitën pas kritikave që ajo bëri për numrin e madh të ministrave si pasojë e pazareve të ulëta.
Diskutimet i hapi shefi i grupit parlamentar “Zeleno-levi blok – Ne davimo Beograd – Moramo” /Lexo shqip: “Të gjelbrit-blloku i majt – Mos ta mbysim Beogradin – Duhet”/, Radomir Lazoviç, i cili tha se përbërja e propozuar e qeverisë është kontinuitet i politikës së derisotme e cila po dëmton qytetarët:
“Kjo është qeveri e një njeriu i cili ka okupuar kompetencat kushtetuese. Ai lëviz ruletin dhe vendos se kush do jetë ministër. Kjo është qeveri e cila ka për qëllim t’ju mundësoj partnerëve që të përfitojnë në dëm të qytetarëve. Kemi dallimet më të mëdha në Evropë, ky është vend i ndotjes së madhe, shtet nga i cili të rinjtë duan të ikin. E pushteti prezanton rezultatet sikur para saj dy gur nuk ishin bashk.”
Ndërsa lideri i partisë ekstreme “Dveri”, Boshko Obradoviç, tha se i pëlqej në veçanti fjala e Ana Brnabiçit se kjo është qeveri serbe, më pas pyeti:
“Çfarë qeverie tjetër duhet të jetë në Serbi? E Kroacisë? Amerikane, qeveri e LGBT? Natyrisht se do të jetë qeveri serbe dhe kurrë më nuk duhet të lejohet që ambasadori amerikan të komandoj në Serbi, siç ishte rasti me gay paradën,” tha lideri i “Dveri” Obradoviç, ndryshe i përdorur nga vetë Vuçiç në çdo tension etnik që është paraqitur në Serbi, me theks të veçantë në Kosovë dhe Sanxhak.
Kështu, qeveria e radhës së Aleksandar Vuçiç që u votua sot ka këtë përbërje: Ana Brnabiç, Kryeministre; Ivica Daçiç, Zv/Kryeministër dhe ministër i Jashtëm; Sinisha Mali, Zv/Kryeministër dhe ministër i i Financave; Maja Gojkoviç, Zv/Kryeministër dhe ministre e Kulturës; Milosh Vuçeliç, Zv/Kryeministër dhe ministër i Mbrojtjes; Tomislav Momiroviç, ministër i Tregtisë së Jashtme dhe të Brendshme; Rade Basta, ministër i Ekonomisë; Jelena Tanaskoviç, ministër i Bujqësisë; Irena Vujoviç, ministër për Mbrojtjen e Ambientit; Goran Vesiç, ministër i Ndërtimit; Dubravka Gjedoviç, ministër i Energjetikës; Maja Popoviç, ministër i Drejtësisë; Aleksandar Martinoviç, ministër i Pushtetit lokal; Tomislav Zhigmanov, ministër për të Drejtat e Njeriut; Bratislav Gashiç, ministër i Punëve të Brendshme; Tanja Mishçeviç, ministër i Integrimeve Evropiane; Branko Ruzhiç, ministër i Arsimit, Jelena Begoviç; ministër i Shkencës, Danica Grujiçiç, ministër i Shëndetësisë; Nikola Selakoviç, ministër i Punës; Darija Kisiç, ministër i Kujdesit për familjen; Husein Memiç, ministër i Turizmit; Zoran Gajiç, ministër i Sportit; Milan Krkobabiç, ministër i Kujdesit për fshatin; Mihailo Jovanoviç, ministër i Informimit; Marko Blagojeviç, ministër për Investime Publike; Ministra të shtetit janë: Novica Tonçev, Gjorgje Miliçeviç dhe Edin Gjerlek.
