Qeveria Hoti hoqi reciprocitetin, Vuçiç: Thaçi e bëri këtë sepse…

Pasi Qeveria e Kosovës mori vendim për heqjen e masave të reciprocitetit ndaj Serbisë, Presidenti i Serbisë, Aleksandar Vuçiç, duke e konsideruar si ide të mirë e ka të qartë se këtë e bëri Hashim Thaçi madje jep dhe arsyen:

“Presidenti i Kosovës, Hashim Thaçi e bëri këtë sepse donte të thoshte ‘nuk më intereson BE-ja, më intereson vetëm SHBA-ja’. Ne nuk jemi në të njëjtin pozicion. Ne mendojmë se Kosova është fëmija i SHBA-së. Nga ana tjetër, është një ide e mirë për të hequr të gjitha pengesat tregtare midis Prishtinës dhe Beogradit. Unë thjesht dua të theksoj se ne nuk jemi në të njëjtin pozicion,” tha Vuçiç gjatë një interviste për televizionin serb, Prva.

Dialogu politik ndërmjet Prishtinës dhe Beogradit është ndërprerë në fund të vitit 2018, raporton RFE, kur u vendos taksa 100 për qind. Pas taksës 100 për qind të vendosur në fund të vitit 2018, pasoi masa e reciprocitetit ndaj Serbisë në prill të këtij viti, që u konsideruan edhe si pengesa për vazhdimin e dialogut ndërmjet Kosovës dhe Serbisë. Beogradi ka kërkuar heqjen e të gjitha pengesave, në këmbim të kthimit në tavolinën e bisedimeve.