Qeveria miraton marrëveshjen për lëvizjen me letërnjoftime në Ballkanin Perëndimor

Qeveria e Kosovës ka miratuar marrëveshjen e lëvizjes me letërnjoftime mes gjashtë shteteve të Ballkanit Perëndimor, që pas hyrjes në fuqi, do të mundësojë lëvizjen pa viza të qytetarëve nga Kosova dhe Bosnjë e Hercegovina.

Kryeministri i Kosovës, Albin Kurti, raporton RFE, në mbledhjen e sotme tha se këtë marrëveshje Qeveria do ta procedojë në këtë legjislacion në Parlament për ratifikim.

“Ratifikimi i shpejtë i tyre është tregues i përkushtimit dhe angazhimit tonë për bashkëpunim rajonal, marrëdhënie të mira fqinjësore dhe avancim drejt integrimit në Bashkimin Evropian,” tha Kurti duke shtuar se me hyrjen në fuqi të kësaj marrëveshjeje për rajonin, “pas ratifikimit nga dy vendet përkatëse, qytetarët e Kosovës dhe të Bosnje Hercegovinës do të lëvizin lirshëm vetëm me letërnjoftime”.

Kjo marrëveshje ende nuk është miratuar nga autoritetet në Bosnje e Hercegovinë, raporton RFE. Më 2014, Kosova vendosi masën reciproke sa i përket regjimit të vizave për shtetasit e Bosnjë e Hercegovinës.

Ndryshe, përveç marrëveshjes së lëvizjes me letërnjoftime, gjashtë shtetet e Ballkanit Perëndimor në kuadër të Procesit të Berlinit arritën më 3 nëntor 2022 në Berlin edhe dy marrëveshje, atë për njohjen e kualifikimeve të arsimit të lartë dhe atë për njohjen e kualifikimeve profesionale të mjekëve, dentistëve dhe arkitektëve.