Qeveria miraton Statutin e Trepçës

Qeveria e Kosovës sot ka miratuar Statutin e Trepçës.

Ministri i Zhvillimit Ekonomik, MZhE, Valdrin Lluka tha se ky Draft e gëzon përkrahjen e të gjitha palëve dhe si i tillë i plotëson kriteret, raporton EO.

“Ky dokument mundëson zbatimin e ligjit për Trepçën, ky Statut propozohet nga Bordi i Trepçës e pastaj aprovohet në Parlament. Versioni aktual gëzon mbështetje të gjerë. Asete sa i përket Trepçës janë të vendosura nga bordi”.

“Do të bëhet edhe një vlerësim pas regjistrimit të Trepçës ku do të paraqitet vlera e aseteve. Kemi ardhur në përfundim që në komision do ta aprovojnë nëse të gjitha palët pajtohen. Statuti i plotëson kriteret”.

Zv/kryeministri Enver Hoxhaj tha se dokumentit i duhet përmirësim dhe qasje profesionale nga Parlamenti.

“E kam përshtypjen që punën që e keni bërë është e mirë, por Parlamentit i duhet edhe 2 javë për me pasë një dokument të mirëfilltë”, tha ai.

Ministri i Financave, Bedri Hamza, tha se dokumenti i statutit të prezantuar do të gjejë vështirësi të zbatimit në praktik.

“Duke vlerësuar punën që është bërë në këtë dokument të rëndësishëm dhe duke vlerësuar punën e të gjitha palëve, ky dokument është dashtë me pas standardin e një dokumenti çfarë duhet të jetë statuti i një ndërmarrje,” tha Hamza duke shtuar:

“Do të duhej të merreshin modele të statuteve ndërkombëtare të korporatave. Gjatë zbatimit të tij në praktikë me përgjegjësi e them që do të ketë vështirësi. Unë besoj që gjatë trajtimit të tij në Parlament do të trajtohet me kujdes”.

Ditë më parë Komisioni për Zhvillim Ekonomik e pati kthyer Draft-Statutin përsëri në Qeveri për shkak të mos harmonizimit të amendamenteve mes sindikatës së Trepçës, bordit dhe Qeverisë. Tani pritet që ai të miratohet edhe nga Parlamenti