Qeveria miraton vendimin: Nga 1 tetori nis indeksimi i pensioneve me 4.1%

Sot Qeveria ka miratuar Vendimin për indeksimin e pensioneve 4.1 për qind ku përfitues do jenë mbi 791 mijë pensionistë.

Efekti financiar nis nga 1 Tetori, bëri të ditur ministri i Ekonomisë Blendi Gonxhja, ku Pensionet e skemës urbane mesatare do të rriten me 752 lekë, kurse ato rurale në vlerën e 453 lekëve.

“Vendimi i qeverisë për indeksimin e pensioneve 4.1 për qind. Nis me pagesat e muajit tetor.

Përfitojnë 791.257 pensionistë, sipas numrit aktual të ndarë në këto dy kategori, pensione nga skema e detyrueshme dhe pensione nga programe e trajtime të veçanta si ushtarakët apo punonjësit e minierave.

Sa i përket indeksimit të pensioneve, efektet llogaritet në 1.693 miliardë vetëm për tre muajt e mbetur të 2024,” tha ministri i Ekonomisë Blendi Gonxhe duke sqaruar se synimi i indeksimit është të ruhet fuqia blerëse.

“Qeveria i ka në fokus, sfidë që të rrisim të ardhurat e pensionistëve që të kemi një jetë sa më të denjë për ta. Po studiojmë mënyrat që të kemi një rishikim të skemës dhe mundësive për të patur një rritje, duke nisur me rritjen e bonusit të fundvitit. Në mes të tetorit nis një proces ku do të shihet rishikimi i pensioneve”

Kështu, nga rritja e pensioneve do të përfitojnë rreth 791.257 përfitues, prej të cilëve 721.705 janë pensione nga skema e detyrueshme dhe 68.613 janë pensione nga programe të veçanta të qeverisë, skema suplementare apo trajtime të veçanta.