Qeveria ndan mjetet financiare për KQZ-në

Ministria e Financave e Kosovës sot ka nda 5 milion e 700 mijë euro, për Komision Qendror të Zgjedhjeve, KQZ.

Këshilltari i ministrit në largim të Financave, Lulzim Rafuna, tha për RFE se “më qëllim të interesit publik dhe duke u bazuar në dekretin e presidentit të Republikës së Kosovës, për caktimin e zgjedhjeve të parakohshme dhe duke u bazuar në nenin 15 paragrafi 2 të Ligjit të Buxhetit ka marrë vendim për ndarjen e mjeteve financiare për KQZ-në”.

Vlerën e këtyre mjeteve KQZ i ka kërkuar për organizimin dhe mbajtjen e procesit zgjedhor që do të mbahen më 6 tetor.

Ndryshe, Komisioni Qendror i Zgjedhjeve ka deklaruar se nuk mund të fillojë asnjë procedurë për organizimin e zgjedhjeve pa alokimin e parave të nevojshme nga Qeveria në largim e Kosovës.

Mbajtja e zgjedhjeve të parakohshme pason dorëheqjen e Ramush Haradinajt nga pozita e kryeministrit të Kosovës, më 19 korrik dhe shpërndarjen e Parlamenti të Kosovës më 22 gusht.