Qeveria proserbe e Malit të Zi merr vendim serbomadh: Nuk do të dërgojmë ushtar në KFOR!
Pasi Qeveria e Malit të Zi është shprehur kundër dërgimit të një toge të këmbësorisë në misionin e NATO-s në Kosovë, KFOR, Sekretari i Përgjithshëm i Aleancës Veri-atlantike, NATO, Jens Stoltenberg, tha sot ne Bruksel se përfshirja e ushtrisë së Malit të Zi në misionin e KFOR-it në Kosovë, do të kontribuonte për paqen dhe stabilitetin në rajon.
“Do të mirëprisja kontributin nga Mali i Zi për KFOR-in sepse një gjë e tillë do të mbështeste punën e rëndësishme të KFOR-it dhe do të ndihmonte që të sigurohej paqja dhe stabiliteti në Kosovë dhe për rajonin. Mali i Zi do të ndihmonte në stabilitetin e rajonit dhe do të punonte me aleatët dhe partnerët e tjerë të NATO-s në misionin e KFOR-it,” tha Stoltenberg, gjatë një konference të përbashkët me Presidentin e Malit të Zi, Millo Gjukanoviç, i cili e pranoi se nuk ekziston ndonjë arsye pse Mali i Zi të mos marrë pjesë në misionin e KFOR-it dhe se kjo ka të bëjë me hamendje politike.
“Dyshimet përpiqen t’i forcojnë ata që janë kundër pavarësisë së Kosovës, të cilët ende mendojnë se ky ka qenë një gabim dhe të cilët përpiqen të kthejnë rrotën e historisë,” tha Gjukanoviç duke rikujtuar se qëndrimi i qeverisë së mëparshme ishte se duhet të rritet prania ushtarake në Kosovë.
Gjukanoviç tha se është edhe obligim i Malit të Zi, si shtet nga rajoni, që edhe më shumë se shtetet tjera të japë kontributin e tij si anëtar i NATO-s, për stabilitetin e rajonit, por Ministria e Mbrojtjes e Malit të Zi ishte e prerë se ushtria e këtij shteti, këtë vit nuk do të dërgojë një togë këmbësorie në misionin e KFOR-it në Kosovë.
“Për shkak të situatës së krijuar nga koronavirusi dhe për shkak të kufizimeve buxhetore, ushtria e Malit të Zi nuk planifikon më 2021 të kryejë aktivitete dhe ushtrime të përbashkëta, trajnime ose angazhim të togjeve të këmbësorisë në misionin e KFOR-it në Kosovë,” thanë nga Ministria e Mbrojtjes e Malit të Zi kur u pyetën nga RFE për arsyen se pse kanë hequr dorë nga dërgimi i trupave në misionin e KFOR-it.
Vendimit për mosdërgimin e trupave në Kosovë i parapriu një paralajmërim i hapur ndaj ministres së Mbrojtjes, Olivera Injac dhe kryeministri Zdravko Krivokapiç, që vijnë nga partia proruse dhe proserbe në pushtet, Fronti Demokratik, FD, se do të mbahen përgjegjës nëse dërgojnë ushtrinë në Kosovë.
Ndryshe, Mali i Zi u bë anëtar i NATO-s në qershor të vitit 2017, dhe një vit më vonë edhe anëtar i KFOR-it, misionit më jetëgjatë të Aleancës Veri-atlantike. Aktualisht, në misionin e Malit të Zi në Kosovë janë të përfshirë dy anëtarë, një oficer i ushtrisë dhe një përfaqësues civil i Ministrisë së Mbrojtjes. Ky angazhim u realizua kur Mali i Zi qeverisej nga Partia Demokratike e Socialistëve e Presidentit, Millo Gjukanoviç, ndërkohë angazhimet që ka marrë Fronti Demokratik me ardhjen në pushtet në gushtin e vitit 2020, me këtë vendim jo vetëm se jetësojnë angazhimin kundër shtetit të Kosovës por edhe konfirmojnë se angazhimi euroatlantik i liderit të lëvizja qytetare URA, Dritan Abazoviç, ishte thjeshtë një gënjeshtër e radhës që doli nga goja e tij edhe sot kur është njeriu dy i Qeverisë së Malit të Zi.
