Qeveria rrezikon jetën e qytetarëve, Basha nga Laçi: Kriminale, vetëm të mos preken lekët për oligarkët!

Kryetari i Partisë Demokratike, Lulzim Basha, pas takimit me banorët e prekur nga tërmeti në Laç dhe vizitën në Kishën 100 vjeçare të Shën Mhillit, e cila ndonëse ka pësuar vetë dëmtime të mëdha prej 18 ditësh siguron ushqim dhe strehon 50 familje në oborrin e saj, konstaton se për këtë zonë zonë janë kujdesur vetëm kisha dhe vullnetarët.

“Përveç kishës dhe vullnetarëve nuk u ka ardhur në ndihmë fëmijëvë, të moshuarve, grave dhe burrave që tërmeti dhe qeveria i ka lënë jashtë, në qiell të hapur. Tërmeti nuk i ndau njerëzit, por qeveria po i ndan. Trajtimi preferencial dhe partiak apo në bazë të miqësive, është ankesa e përditshme në cdo zonë të goditur nga tragjedia,” konstaton për fat të keq Lulzim Basha aty ku edhe vetë ndërtesa e kishës ka pësuar dëme të mëdha.

“Edhe pse kanë kërkuar ndihmë urgjente pasi një pjesë e saj, rrezikon të shembet duke rrezikuar kështu jetën e shërbyesëve të Zotit dhe të besimtarëve ende askush nuk i ka ndihmuar,” tha Kryetari i Partisë Demokratike duke shprehur mirënjohje për ekspertët që i janë përgjigjur thirrjes se opozitës për të berë një vlerësim të gjendjes së kishës, dhe natyrisht është detyrimi i shtetit të bejë vlerësimin dhe të japë zgjidhje për çdo objekt.

“Çdo ditë po del më qartë e më shqetësuese mënyra se si janë vlerësuar objektet. Vlerësime të ndryshme për një objekt, verifikime me mjete qesharake nga punonjës te administratës pa asnjë kualifikim, janë kthyer në kembanë alarmi për rrezikun që u kanoset banorëve në qindra banesa.”

Është kriminale që qeveria të rrezikojë jetën e qytetarëve vetëm që të mos prekë lekët që u jep oligarkëve, vlerëson Basha, kjo është dhe arsyeja pse qeveria nuk angazhoi rreth 500 inxhinierë me eksperiencë për të kryer verifikimin e objekteve. Sepse rezultati duhet të jetë sipas interesit të qeverisë dhe jo sipas realitetit.

“Është pikërisht kjo neglizhencë kriminale që solli viktima ne Thumanë e Durrës me 26 nëntor. Nëse do të merreshin masa pas tërmetit te 21 shtatorit, shumë jetë do ishin shpëtuar,” shprehet Kryetari i Partisë Demokratike, Lulzim Basha, në fund të vizitës së tij në zonat e prekura nga tërmeti në Laç duke përfunduar:

“Propaganda, korrupsioni dhe paaftësia po kërcënojnë seriozisht edhe sot sigurinë e mijëra banorëve që po vuajnë edhe për bukën e gojës!”