Qeveria teknike, Gjiknuri: Nuk diskutohet, Bylykbashi: Kushtëzim i Reformës!
Çështja e sinjalizuesve, roli i policisë, raportimet, ruajtja e rendit publik rreth Qendrës së Votimit, janë disa propozime të opozitës që do ti pranojmë me aktet ligjore e nënligjore në fuqi, duke u dhënë zgjidhje brenda tyre, tha pas takimit të Këshillit Politik të Reformës Zgjedhore, përfaqësuesi i Partisë Socialiste, Damian Gjiknuri, duke i quajtur propozime të karakterit garantues dhe teknik për më shumë transparencë, për të cilat mazhoranca, tha ai, është e gatshme që ti pranojë por propozimi për qeveri tranzitore, Gjiknuri ishte i prerë se as nuk do të dikskutohet.
“Besoj se jua kam dhënë përgjigjen për këtë javën e kaluar. Nuk ka diskutim për qeveri tranzitore. Ato gjëra që nuk i arritën me “luftë” në rrugë nuk mund ti marrin me negociata në tavolinë. Pra, kjo është një çështje e ezauruar dhe është një çështje politike. Nuk ka lidhje me reformeën zgjedhore çështja e qeverise tranzitore apo kujdestare. Për mua është diçka e mbyllur dhe nuk e konsideroj si problem.”
Por përfaqësuesi i PD në Këshillin Politik, Oerd Bylykbashi shprehet se deklaratat e Gjiknurit bëhen me qëllim kushtëzimin e reformës dhe në këtë mënyrë PS të vazhdojë me misionin e saj të blerjes së votave me ndihmën e kriminelëve. Një qeveri kujdestare pa Edi Ramën, tha Bylykbashi dëshmon se masat e Reformës Zgjedhore garantojnë realisht interesin e zgjedhësve shqiptarë.
“Deklaratat e sotme te perfaqesuesit te Kryeministrit ne Reformen Zgjedhore, nuk jane asgje tjeter vecse kushtezim i saj me nje qellim te vetem: te bllokojne reformen zgjedhore dhe PS te vazhdoje te bleje vota dhe te perdore kriminelet. Qendrimet e PS ne reforme synojne qe vjedhjes se zgjedhjeve t’i vendosin vulen e gjykatesve qe kane vene nen thunder dhe presion politik me vetingun, sic e thote troc ODIHR ne raportin perfundimtar per 30 qershorin 2019,” tha Bylykbashi duke rikujtuar se OSBE/ODIHR e tha qarte se më 30 qershor 2019 votimet u kryen pa marrë në konsideratë interesin e zgjedhësve për të zgjedhur të lirë dhe në fshehtësi dhe për pluralizëm demokratik.
“Opozita e bashkuar, ne perputhje me angazhimin e saj publik ka bere propozime qe synojne te mbrojne voten e shqiptareve nga kriminelet dhe te korruptuarit qe rrethojne Edi Ramen. Propozimi i Opozites se Bashkuar per nje qeveri kujdestare pa Edi Ramen eshte garancia qe masat e reformes zgjedhore nuk mbeten vizatime ne leter, por garantojne realisht interesin e zgjedhesve shqiptare. Opozita nuk pranon reforme farse por vetem nje reforme zgjedhore te vertete!”
Në fund, Gjiknuri u pyet nëse lëvizjet e fundit të Presidentit dhe paralajmërimi për shpërndarje Parlamenti ndikojnë tek ecuria e reformës zgjedhore:
“Unë besoj se Partia Demokratike është aty për të miratuar Kodin Zgjedhor në bashkepunim me ne dhe Parlamentin, pasi është Parlamenti ai që do ta miratojë atë. Kështu që nëse vërtet duan dhe kanë vendosur ti kthehen institucioneve, bënë shumë mirë që u ulën në tryezën e reformës. Besoj se thirrjet e Presidentit nuk duhet të ndikojnë dhe nuk ka përse Partia Demokratike të përfshihet në lojën e Presidentit.”
