Qymyr me kokainë në Portin e Durrësit, në anijen me kapiten rus zbulohen…

Mbi 60 kg kokainë është zbuluar sot në orët e para në një anije me qymyr që vinte nga Kolumbia.

Kokaina është kapur në hambarin e anijes “Unistream” me flamur të Antigua Barbuda nga Ishujt Karaibe. Ajo ishte e ndarë në 53 pako, në 2 çanta dhe deri më tani bëhet fjalë për 60 kg, teksa kontrolli do të vijojë sërish, pasi droga ishte futur mes qymyrit. Policia bëri kontroll me qen antidrogë, por nuk e pikasën kokainën, për pasojë do të kontrollohet gjithë sasia e qymyrit prej 6.500 ton.

Kanë qenë partnerët ndërkombëtar që kanë sinjalizuar Policinë Shqiptare për sasinë e drogës dhe më pas është kryer edhe operacioni nga Task Forca e Durrësit që ka zbuluar kokainën në anijen që sillte qymyr nga Kolumbia.

Anija “Unistream” me kapiten nga Rusia është nisur nga porti i Barranquilla në Kolumbi në 26 prill në orën 11:32 dhe ka mbërritur në Portin e Durrësit në 16 maj, pra një ditë më parë në orën 08:32. Nuk dihet nëse sasia e drogës kishte si destinacion final Shqipërinë apo Porti i Durrësit ishte përdorur si tranzit nga trafikantët.

Ndryshe, hera e fundit kur në Portin e Durrësit u kap droga ishte më 5 prill me 1 kg heroinë, ndërsa sasia më e madhe gjatë këtij viti, ishte ajo në muajin janar kur u kapën 119 kg kokainë të ngarkuara me kamionët me banane.