“Rama 2” përmbyllet nga Edi Rama, Basha: Bilanci real, Shqipëria e pajetueshme për fëmijët tanë!
Plehrat digjen në kriza mjedisore të stisura, krimi gëlon prej ortakërisë me pushtetin, korrupsioni ka kapur shtetin dhe varfëron e largon shqiptarët, të braktisur edhe në kohë pandemie, thekson Kryetari i Partisë Demokratike, Lulzim Basha, në reagimin e tij pas fjalës përmbyllëse të mandatit të dytë qeverisës të Kryeministrit Edi Rama, duke e konsideruar bilanc real të një regjimi që masakron zgjedhjet vetëm për të vjedhur familjet shqiptare.
“Autorët e tij duhet të ishin përpara drejtësisë për atë që u kanë bërë Shqipërisë dhe shqiptarëve në këto 8 vite, jo duke përrallosur për arritje imagjinare. Partia Demokratike është e angazhuar për të sjellë ato zgjidhje që masakra e 25 prillit u mohoi qytetarëve, sepse asgjë e mirë nuk mund të vijë nga një e keqe e vjetër që e ka bërë Shqipërinë të pajetueshme për fëmijët tanë,” thekson Lulzim Basha në reagimin e tij përmes rrjetit social Twitter duke konstatuar me keqardhje dhe integrimin i cili mbahet peng nga dështimet e njëpasnjëshme.
Reagimi:
Asgjë e re nga përsëritja e mashtrimeve të vjetra. Plehrat digjen në kriza mjedisore të stisura për të çuar taksat e qytetarëve te mafia e inceneratorëve, krimi gëlon prej ortakërisë me pushtetin, korrupsioni që ka kapur shtetin është i përhapur në cdo qelizë të qeverisë, varfëron dhe largon shqiptarët, të braktisur edhe në kohë pandemie me numrin më të lartë të vdekjeve në raport me popullsinë në Europë dhe paketat më të vogla ekonomike në kontinent, integrimi në të cilin mbahet peng nga dështimet e njëpasnjëshme.
Ky është bilanci real i një regjimi që masakron zgjedhjet vetëm për të vjedhur familjet shqiptare.
Autorët e tij duhet të ishin përpara drejtësisë për atë që u kanë bërë Shqipërisë dhe shqiptarëve në këto 8 vite, jo duke përrallosur për arritje imagjinare.
Partia Demokratike është e angazhuar për të sjellë ato zgjidhje që masakra e 25 prillit u mohoi qytetarëve, sepse asgjë e mirë nuk mund të vijë nga një e keqe e vjetër që e ka bërë Shqipërinë të pajetueshme për fëmijët tanë.
