Rama: Heqja e tatimfitimit për biznesin me xhiro deri 14 mln lekë, përfiton 77% e sipërmarrjes në vend

Kryeministri Rama deklaroi në një komunikim për mediat se nga miratimi i vendimit për heqjen e tatimfitimit për bizneset me xhiro deri në 14 milionë lekë, përfiton 77% e sipërmarrjes në vend.

Nga 1 janari 2021 biznesi me xhiro deri në 14 milionë lekë përjashtohet nga tatimfitim. Aktualisht bizneset me xhiro deri në 5 milionë lekë janë të përjashtuar nga tatimfitimi. Biznese me xhiro nga 5 deri në 10 milionë lekë paguan normë të thjeshtuar 5%, ndërsa ato me xhiro nga 10 milionë deri në 14 milionë lekë paguajnë 15% tatimfitim.

“Në Kuvend kaluam masën e cila është unikale në rajon dhe përkon me zotimin tonë për të mbështetur fuqimisht ata që krijojnë punë për vetë dhe të tjerët.

Sot me vendim të Kuvendit, bizneset e vogla me xhiro deri në 14 milionë lekë nuk do të paguajnë tatimfitim. Bizneset me xhiro deri 10 milionë lekë nuk do të paguajnë as TVSH. Rreth 7 vite më parë biznesi i vogël paguante 10% tatimfitim. Me xhiro nga 0 deri në 8 milionë lekë ishin 60 mijë biznese, të cilat paguanin tatimfitim të dyfishtë, edhe atë për pushtetin vendor. Heqja e tatimfitimit është masë nxitëse për punësimin te biznesi i vogël. Në vitin 2006-2013 biznesit të vogël i janë marrë 19 miliardë lekë, ndërsa nga 2014-2019 ka paguar 5,3 miliardë lekë.

Sot janë 93,743 biznese ose 77% e totalit të bizneseve që paguajnë zero tatimfitim, 14% e tyre paguajnë 5% tatimfitim dhe të dyja këto kategori pas kalimit të ligjit në Parlament, nuk do të paguajnë tatimfitim.

Në regjistrin e fundvitit 2019, kishim 680 mijë të punësuar, apo 50% më shumë nga sa gjetëm.

Pandemia mund të rrafshonte biznesin e vogël, por sot jemi në kushtet kur me frymëmarrje të lehtësuar mund të shohim se nuk kemi lëmë askënd prapa, të cilët i mbështetëm me 7 mld lekë 38,840 biznese dhe me 40 mijë lekë mbështetëm 172,490 të punësuar.”

Kryeministri Rama tha se efekti nga shtyrja e kësteve të tatimfitimit të thjeshtuar dhe tatimit mbi fitimin është 19,1 miliardë lekë.

“Janë 19,1 miliardë lekë apo 191 milionë dollarë që për shkak të pandemisë, iu lanë biznesit. Nuk më rezulton që po i lëmë një tullë mangut programit masiv të rindërtimit, apo njerëzve në çdo sektor. Në javën e ardhshme do të ballafaqojmë zotimet tona me shifrat dhe faktet.”/Monitor/