Rama i shqetësuar nga komentet negative në ERTV/ Punë ka, por s’ka të kualifikuar…

“Në muajin qershor Zyrat e Punës ndërmjetësuan dhe realizuan 3,590 punësime. Gjashtëmujori u mbyll me 14.593 të punësuar të rinj vetëm përmes Zyrave të Punës”.

Shifrat u bënë publike nga kryeministri Edi Rama në një takim me drejtuesit e zyrave të punës,  të cilëve u ka kërkuar ta përmirësojnë akoma shërbimin, pavarësisht arritjeve deri tani.

“Duke iu referuar sistemit tonë të taksave, emër për emër për çdo person të punësuar nga maji i vitit të kaluar në këtë qershor ne kemi 28 mijë e 324 të punësuar më shumë formalisht edhe në sektorin jo bujqësor. Shifër që jam i bindur në rrjetin e komentatorëve të ERTV do përqeshet, do shikohet si gënjeshtër etj etj, por është realiteti siç është realiteti edhe fakti që përmes zyrave të punës, vetëm përmes tyre janë punësuar në 6 mujor mbi 14 mijë persona.

Për të gjithë ata që nuk duan të jenë në anën e llogores së baltës dhe përqeshjeve, por duan të bëjnë verifikimin e shifrave ti referohen regjistrit të sigurimeve shoqërore dhe Tatimeve e gjithcka është e lexueshme.

Tregu i punës ka një hall të madh me mungesën e të kualifikuarve për nevojat e tij e këtu kemi punë për të bërë me programin e nxitjes së punësimit, duhet të ketë transparencë, e duhet ta ndiqni zbatimin e programit.

Dua të theksoj, se nuk mblidhemi këtu për ti bërë qejfin njëri tjetrit, se duhet vënë gishti të problemet.

Përtej rezultateve pozitive, ka nevojë për qartësim nga ana e zyrës qëndrore për procedurat e punësimit, që të reflektohen në listpagesat e bizneseve. Dobësia më e madhe e zyrave të punës sot është në kontaktin me vetë biznesin. Garantoni punonjësit në raport me kushtet dhe rregullat, të marrim përgjegjësinë e garantit që po i punësojmë njerëzit në kushte normale.

Se e dimë që në shumë biznese nuk respektohen rregullat”, tha Rama.