Rama kërcënoi BE-në me ndryshim kursi, Berisha: Mos tento, do përballesh me revoltë popullore!

Pas kërcënimit të Kryeministrit Edi Rama drejtuar Bashkimit Europian, BE, që në rast se nuk i çelin negociatat me Shqipërinë “do të rishikojmë qëndrimin tonë”, sot lideri historik i PD, Sali Berisha i bëri të qartë Edi Ramës se do të përballet me reagime të ashpra popullore nëse nuk bëhen hapa para në këtë proces duke e konfirmuar edhe sot se është krimi shqiptar ai i cili po i vonon negociatat e Shqipërisë në BE.

Ndërsa për strategjinë e ndryshuar të akuzave ndaj Sali Berishës duke folur tashmë për pamundësi për shkak të parashkrimit, Ish-kryeministri Sali Berisha e sfidoi Kryeministrin Edi Rama duke thënë se është i gatshëm të propozojë në parlament ndryshimin e Kodit Penal, për të përjashtuar Kryeministrat nga parashkrimi.

Dhe, sot, Ish-Presidenti Sali Berisha, nuk kishte se si ta fillonte ndryshe konferencën e përjavshme përveç se me rezolutën që dënonte gjenocidin në Srebrenicë, e cila u rrëzua nga mazhoranca në Parlament, duke e cilësuar si aktin më të rëndë që ka ndodhur në historinë 30-vjeçare të Shqipërisë.

“Për çdo shoqëri dënimi i gjenocidit është një detyrim madhor , moral por edhe ligjor . Siç jeni dëshmitar në Parlamentit e Shqipërisë dje ndodhi akti më i rëndë në historinë 30-vjeçare të këtij vendi. Refuzimi për të dënuar me një rezolutë një gjenocid të konfirmuar nga Gjykatat ndërkombëtare, Gjykata e Krimeve të Luftës në ish-jugosllave dhe Gjykata Ndërkombëtare e Hagës. Mbi bazën e vendimit të këtyre gjykatave vendet e lira kanë kaluar në parlament rezoluta që dënojnë gjenocidin në Srebrenicë, si aktin më barbar. Këtë e ka bërë Parlamenti Europian, parlamentet e tjera të europës, po ashtu edhe parlamenti i Malit të Zi ku dihet që jetojnë një shumicë e konsiderueshme serbësh. Jo si gjenocid por si masakër në vitin 2019 e ka dënuar edhe vetë parlamenti i Serbisë, Shqipëria ishte vendi i vetëm që nuk ka dënuar asnjë nga gjenocidet që kanë ndodhur. Shqipëria jo që nuk dënoi, po shkalla e lartë e kriminalizimit të pseudomazhorancës së sotme që bëri që Shqipëria dje të refuzojë një rezolutë për dënimin e gjenocidit në Bosnjë.

Në mënyrë absolute unë që po flas para jush, nuk mendoja se kjo rezolutë nuk do të votohej  nga mbarë parlamenti. Pretendimet e Ramës dhe Ballës janë të neverishtme, të personave të inkriminuar në çdo qosh dhe skaj të psikologjisë së tyre. Rezoluta nuk ishte e befasishme, për miratimin e rezolutave ka nene rregullorja dhe siç e dini procedurën nuk e ka në dorë pakica. Rezoluta është dorëzuar nga deputeti Tritan Shehu dhe është shqyrtuar në byro dhe është refuzuar nga qeveria në byronë parlamentare, por rregulli kërkon që nuk mund të jetë qeveria ajo që refuzon. Duhet të jetë parlamenti për ta pranuar apo jo

Rama dhe Balla mashtruan, kur thonë se nuk është votuar kundër rezolutës. Vota e djeshme ishte votra më e egër që ,mund të bëhej në Parlament kundër një rezolute. Nuk është e vërtetë që u shty për më vonë. Rregullorja e Parlamentit ka përcaktime të qarta, kur një rezolutë hidhet poshtë me votë nuk mund të futet më në një afat të shkurtër kohor. Edi Rama deklaroi dje se fajin e ka Saliu. Duhet të jesh në stadin e primitivitetit që edhe një akt të tillë të ndërgjegjes individuale dhe njerëzore tua kalosh të tjerëve. Pa asnjë diskutim që PD do të paraqesë dora dorës dhe gjithnjë politikën e saj të jashtme dhe qëndrimet e saj. Qëndrimi ynë ndaj gjenocidit serb në Srebrenicë është në përputhje të plotë me ligjin ndërkombëtar. Qëndrimi i Ramës dhe i Ballës është qëndrim zuzar dhe zuzar quhet kur nuk përfill, ligj, normë dhe standard. Dënoj qëndrimin e tyre të djeshëm,” tha Sali Berisha ndërsa për ngërçin e krijuar për hapjen e negociatave me BE ai u shpreh qartë se nuk janë fajtore vendet e Evropës, por vetë kryeministri Edi Rama.

“Evropa e koncepton Ballkanin e Hapur, ndaj krimit, ligjeve. Pra, Shqipëria ndodhet në një moment kritik. Kreu i narkoshtetit është i plagosur rëndë. I rrezikshëm. Ai mendon se do t’i japë vendit drejtim tjetër. Mos tento të spostosh në mënyrë absolute sepse do të përballesh me revoltë të fuqishme popullore. Misioni ynë është një dhe vetëm një: Integrimi në BE. Nuk kanë faj vendet e Evropës nëse ai sillet si gangstrer me gazetarët,” tha Berisha duke ardhur sot me një propozim shumë sfidues për Edi Ramën:

“Nuk kanë përgjegjësi vendet e Evropës kur ai mban qëndrime si Kim Jong-un ndaj Drejtësisë për të hetuar kundërshtarët e tij. Në je burrë dhe ta mban hajde të kalojmë ligjin në Parlament të përjashtojmë kryeministrat nga çdo lloj parashkrimi. Urdhëro që nesër të kalojmë ligjin në Parlament, të ndryshojmë Kodin penal. Të vetmit që të përjashtojmë nga parashkrimi të jenë kryeministrat. Dhe s’duhet parashkruar,” tha Ish-Kryeministri i bindur se Edi rama ka frikë ta bëjë por ai e bëri publike firmën e tij pro kësaj nisme:

“Nuk e bën dot këtë se ka frikë dhe tmerr nga firmat e tij për të cilat thotë se nuk di ç’kam firmosur për të mbushur valixhet. Unë ftova kreun e qeverisë t’i përgjigjet thirrjes sime. Unë jam gati të firmos për këtë pa asnjë ekuivok. Pas qindra dhe mijëra kontrolleve nuk kanë gjetur dot asnjë shkelje për të provuar shpifjet e tyre, tani thonë që koha kur kam qenë unë kryeministër është e parashkruar. Unë e kam deklaruar që nuk njoh parashkrim. Nëse do, unë jam gati nesër të votoj që parashkrimi të funksionojë, por jo për kryeministrat. Nuk mund të ketë parashkrim kur kryeministri bëhet kryetar i një organizate kriminale.”

Pavarësisht kërcënimi publik të Edi Ramës, që i bëri dje Bashkimit Europian, se në rast se nuk merret vendimi për çeljen e negociatave, Sali Berisha uron që të merret vendimi për çeljen e engociatave me BE ndërsa i bëri thirrje shqiptarëve të ngrihen sa nuk është vonë.

“Opozita e vërtetë është krejt tjetër. As është pajtuar dhe nuk do pajtohet me qëndrimet antinjerëzore të kreut të narko-shtetit të parë dhe të vetëm në Europë. Ndaj ju bëj thirrje shqiptarëve që të ngrihen në lartësinë e njerëzisë së tyre, idealeve të tyre dhe të gatshëm për reagimet e nevojshme në mënyrë që të marrë përgjigjen e duhur Edi Rama. E vërteta është se qëllimi më kryesor i kësaj bisede ishte parashikuar. Deklarata e djeshme e Ramës, kërcënimi publik që i bëri BE, se në rast se nuk merret vendimi për hapjen e negociatave, ne do shohim drejtimin e qëndrimit tonë. Unë uroj që të merret vendimi. I bëj thirrje publikisht komunitetit, BE, që Shqipërisë t’i hapen negociatat,” tha Berisha ndonëse Edi Rama nuk ka plotësuar dhe s’plotëson asnjë kusht për t’i hapur ato.

“Le të dalë një shqiptar dhe të më thotë se ça ka bërë ai këto 9 vite. Dua t’i pyes shqiptarët. Unë them se duhen hapur negociata. në një periudhë të turpshme, pasi fitoi zgjedhjet mori ministrin e Jashtëm dhe shkoi në Britaninë e Madhe ku i kërkoi takim drejtorit të Ballkanit. Ai iu përgjigj se; Zoti kryeministër, nuk mund t’ju presë në zyrën time, s’më lejon protokolli. Juve ju pret ministri apo kryeministri, jo drejtori. Atëherë po vij në hotel, aty ku je ti, se ndryshe nuk mund të bëhet. Këtu ka dëshmitarë. Drejtori i nderuar shkoi në hotel, Cili ishte subjekti i takimit? “Na shtyni statusin e kandidatit për 6 muaj që mos të kuptohet që po merret nga ish-qeveria e Berishës”. Ai u skandalizua. Dhe pas takimit diplomati i njohur britanik i tregon ambasadorit tonë përmbajtjen e takimit. Jua rikujtova këtë rast se ky njeri në 9 vite veçse ka shkatërruar standardet që kërkohen.”Në fund, edhe në këtë dalje të përjavshme lideri historik i Partisë Demokratike u pyet se si do të veprojë nëse vendimet e Kuvendit të 11 dhjetorit nuk njihen nga Gjykata e Apelit.

“Nëse më votojnë anëtarët do të jem anëtar i PD. Kushdo tjetër i pazgjedhur do të jetë i Edi Ramës. Është e thjeshtë. Nuk ka asnjë lloj targeri, apeli, për të njohur apo jo forcat politike. Kjo drejtësi kontrollohet nga qeveria dhe jo vetëm qeveria. Kjo e bën më jetik revolucionin që zhvillohet në Shqipëri,” tha lideri historik i PD, Sali Berisha duke e saktësuar në fund se është krimi shqiptar ai i cili po i vonon negociatat e Shqipërisë në BE.

“Mos mendoni kurrë, se udhëheqësit Evropianë nuk duan zgjerimin. Absolutisht ata e duan, nuk i pengon asgjë që të thonë këto vende do të bashkohen me ne. Problemi i tyre numër 1 janë të dhënat për krimin që i trembin. Nuk është më sekret, e ka thënë publikisht, që Franca nuk është dakord për dhënien e vizave të Kosovës për shkak të krimit shqiptar. Vagonët, kontejnerët e krimit do të vërshojnë drejt kryeqyteteve të tyre. Barcelona është një nga qytetet më të bukura. Çfarë qëndron të themi? Barcelona e ditës është ajo që them unë, por kush është Barcelona e natës? Bandat shqiptare. Ata shqetësojnë jo vetëm qytetin e mrekullueshëm, por edhe qeverinë spanjolle. Janë të konstatuara. Po Ajran Ndoji që ka dalë duke folur me kriminelët? Janë të vërteta këto. Do të dalin të gjitha. Këtu do jemi.”