Rama me furnizuesit e ushqimeve: Bord edhe për çmimet e shportës, kush abuzon humbasë mallin

Pas bordit për çmimin e naftës do të ngrihet edhe një bord për administrimin e çmimit të shportës për të mos u lejuar abuzimet.

Kështu deklaroi kryeministri Edi Rama gjatë takimit me përfaqësues të bizneseve furnizuese të ushqimeve për masat që po ndërmarrën nëpërmjet Paketës së Rezistencës Sociale.

“Bord për çmimin e shportës, do të bëhet nga përfaqësues të qeverisë dhe të bizneseve furnizuese. Çmimet e ushqimeve do të vendosen aty dhe askush nuk do të tolerohet që të abuzojë me to. Nëse kjo ndodh do të konfiskohet prodhimi i tyre. Kjo do të ndodhë me ligj përmes një akti normativ. Kush do të lozë me çmimet jashtë asaj që vendoset do të humbasë mallin. Sigurisht që do të keni dhe ju fitimin tuaj, por jo si e keni pasur pasi nuk ka sens në një kohë krize”.

Kreu i qeverisë iu drejtua bizneseve që të harrojnë pak fitimin dhe të vendosin kapacitetet në funksion të krizës.

“Në i dimë vështirësitë tuaja, ku kryesoja dhe ajo që mund të rëndohet më tutje është gjetja e tregjeve, zëvendësimi i tyre, por tani është momenti për të harruar fitimin. Tan është momenti për të vendosur kapacitetet tuaja në funksion të përballimit të kësaj sfide shumë të madhe që nuk e kemi zgjedhur ne. Janë disa produkte bazë të shportës, ai më domethënës është vaj që kanë kërcyer në çmim jo pa arsye, por ku ne besojmë se ka hapësirë për të manovruar me një ulje të çmimit për to,” tha Edi Rama duke përfunduar:

“Ka vend për të ndërhyrë dhe jo pak në këtë moment. Unë besoj që  kanë të drejtë ekspertët tanë të cilët mendojnë se ky moment i parë alarmi që u krijua ishte i paevitueshëm, tani nuk mund të vazhdohet sikur asgjë s’ka ndodhur.”/Monitor/