Rama në takimin me Ambasadorët/ Fituam 12 muaj kohë, nuk humbëm me negociatat…

Shqipëria ka fituar 12 muaj kohë dhe nuk i ka humbur ato. Kjo është teza më e re e përdorur nga Kryeministri Edi Rama lidhur me shtyrjen me të paktën 1 vit të vendimit për hapjen ose jo të negociatave mes Shqipërisë dhe BE-së.

Në një takim me ambasadorët e vendeve të BE-së të akredituar në Tiranë dhe strukturat e integrimit europian në Ministrinë për Europën dhe Punët e Jashtme, Rama theksoi se ka një ndryshim mes çeljes së negociatave në mënyrë menjëhershme dhe pas 12 muajve, këtë nuk mund ta mohojmë.

Ai shtoi se edhe sikur çelja të ishte imediate ne do na duhej një punë përgatitore që do të merrte një kohë të caktuar, nga 6 deri në 12 muaj, dhe fati që çelja e negociata është përcaktuar pas 12 muajsh, por ndërkohë komisioni do të nisë menjëherë procesin përgatitor, është procesi më i plotë dhe i mirëpritur nga ana jonë.

“Dua të nënvizoj atë që në 72 orët e dallgëve të larta të procesit, fillimisht në Luksemburg e më pas në Bruksel, që bënë fqinjët tanë grekë dhe italianë.

Ata bënë asgjë më pak sesa do të kishim bërë ne vetë nëse do të ishim të pranishëm. Ne mungonim por falë angazhimit të jashtëzakonshëm të këtyre dy miqve ne nuk munguam aty. Ishte një ndihmë e jashtëzakonshëm për ne dhe Maqedoninë e Veriut. Sot kemi kapërcyer një moment tejet delikat, Shqipëria ka bërë para çeljes së negociatave, më shumë se çdo vend tjetër.

Ishte një rrezik real që të mbeteshim në këtë moment pa tekst. Dy orë para vendimmarrjes, nuk kishim tekst, për shkak të dinamikës së brendshme të tryezës së bisedimeve ku 25 vende u rreshtuan në mënyrë të vendosur për të mbështetur çeljen e negociatave, dhe tre vende të tjera ishin në pozicion të ndryshëm, për arsye që i kemi dëgjuar në vazhdimësi dhe i mirëkuptojmë.

Ka një ndryshim mes çeljes së negociatave në mënyrë të menjëhershme dhe pas 12 muajve, këtë nuk mund ta mohojmë. Por edhe sikur çelja të ishte imediate ne do ta duhej një punë përgatitore që do të merrte një kohë të caktuar, nga 6 deri në 12 muaj, dhe fati që çelja e negociata është përcaktuar pas 12 muajsh, por ndërkohë komisioni do të nisë menjëherë procesin përgatitor, është procesi më i plotë dhe i mirëpritur nga ana jonë.

Më vjen për të qeshur dhe për të qarë kur dëgjoj se Evropa ka vënë kushte, nuk ka vënë asnjë kusht por ka nënvizuar kushtëzimet që ka kjo fazë. Qeshëm me kryeministrin e Malit të Zi, kur po diskutonim për 5 prioritet, dhe tha se ‘prit prit se pastaj do këtë më shumë kushte”, kjo është thjeshtë çështje përputhshmërie me parametrat e një vendi të BE.

Të jemi realist, nuk ka thënë dhe nuk thotë as komisioni dhe as këshilli asgjë më shumë dhe sikur larg qoftë të dilnim nga 72 orët e ferrit pa tekst e pa datë, ne do vazhdonim vettingun, do vazhdonim për ngritjen e institucioneve të drejtësisë, do vazhdonim atë që bëjmë përditë, luftën kundër krimit dhe korrupsionit.

Nuk është se këto do të ndalonin nëse negociatat do të hapeshin menjëherë. Ky proces nuk është për Evropën, është për fëmijët tanë, për të ndërtuar këtu një shtet Evropian”, tha Rama.