Rama shet patriotizëm kot në Sarajevë: Të mundësohet lëvizja me karta identiteti për qytetarët e Kosovës!

Pasi përbuzi shtetin e Kosovës dhe Kryeministrin e saj Albin Kurti, Kryeministri Edi Rama duke e ditur se është Republika Srpska ajo që ka bllokuar marrëveshjen e firmosur nga Bosnje Herecegovina si pjesë e Procesit të Berlinit, për lëvizjen e lirë me karta identeti, i kërkon kot Kryetares së Këshillit të Ministrave të Republikës së Bosnje Hercegovinës, Borjana Krishto, që të lejoj lëvizjen e lirë me kartë identiteti për qytetarët shqiptarë të Kosovës.

“Uroj që ky të jetë një shembull se si të gjithë vendimet dhe proceset kaq të rëndësishme për mirëqenien e përbashkët duhet të merren dhe zbatohen. Dëshirojmë t’i forcojmë marrëdhëniet me Bosnjen dhe jemi duke përgatitur hapjen e Ambasadës së Republikës së Shqipërisë në Sarajevë. Në Bosnje jeton një komunitet shqiptar dhe më vjen mirë të them që komuniteti boshnjak në Shqipëri i ka të garantuara të drejtat e veta gjuhësore, kulturore, fetare që janë të garantuara në ligjin e minoriteteve të republikës së Shqipërisë,” tha njeriu që me dorën e vet e mbylli Ambasadën e Shqipërisë në Sarajevë dhe sot në rolin e patriotit bën sikur kujdeset për shqiptarët.

“Nga ana tjetër nuk është sekret që Shqipëria mbron edhe interesat e shqiptarëve në Kosovë dhe në vende të tjera dhe unë ia thashë edhe kryeministres që jemi të interesuar që marrëveshjet e Procesit të Berlinit, dhe marrëveshja për lëvizjen e lirë me kartë identiteti për qytetarët shqiptarë të Kosovës të mundësohet sepse është e pakuptimtë që të kemi problematika të kësaj natyre ndërkohë që politika duhet të shërbejë,” tha Edi Rama i cili më pas u takua me anëtarin e Presidencës së Republikës së Bosnje Hercegovinës, Denis Beçiroviç.

Ndryshe, këtë shitje të patriotizmit Kryeministri Edi Rama e bënë në kuadër të turit të tij ballkanik për përgatitjen e takimit të radhës së Procesit të Berlinit që pritet të mbahet në muajin tetor në Tiranë, duke shpërfillur Milorad Dodikun, njeriun që bllokoi këtë marrëveshje dhe sot nga Borrelli dhe BE krahasohet me Albin Kurtin.

Dhe, jo vetëm kaq! Kjo shfaqje e Edi Ramës në Sarajevë paralajmëron edhe një stuhi patriotizmi gjatë vizitës në Beograd, ku si Kryeministri Rama ashtu dhe Presidenti i Serbisë, Aleksandar Vuçiç, do të kenë rastin ti ndërsejnë ithtarët e tyre ndaj Kryeministrit të Kosovës, Albin Kurti!