Rama: S´mund të mbetemi peng të frymës kundër zgjerimit të BE, ja miqtë tanë të vërtetë

Kryeministri Edi Rama deklaroi sot se Shqipëria nuk duhet të mbetet peng i frymës kundër zgjerimit të BE-së, duke shtuar se thellimi i reformave varet nga qeveria.

Këtë deklaratë Rama e bëri gjatë takimit me Komisionerin për Zgjerimin, Johannes Hahn, që po zhvillon një vizitë në Tiranë.

“Rruga drejt BE-së nuk do të ishte e mundur nëse nuk do të kishim në krah njerëzit në Komisionin Evropian. Ata kanë pasur një përkushtim shumë pozitiv për Shqipërinë. Ky është një element që na lehtëson dhe na motivon që ta bëjmë këtë proces më mirë akoma.

Në atë beteje 72-orëshe, Shqipëria ka pasur shumë miq, që kanë qenë të vërtetë dhe të vendosur. Duke filluar nga ministrat e Jashtëm të vendeve fqinje, si ai i Italisë dhe Greqisë, kanë luftuar për të drejtën tonë që të na njihet merita njësoj sikur po luftonim ne.

Dua që t´i shpreh komisionerit dhe ekipit të tij, mirënjohje për çfarë kanë bërë, dhe i them se ne do ja dalim falë dhe mbështetjes së tij.

Rezultatet dhe të vettingut po flasin për drejtësinë e re. Pastrimi i drejtësisë është një proces i pakthyeshëm.
Pastrimi i shumë figurave që mbanin peng drejtësinë, është një provë e vullnetit”, tha Rama.