Rama sulmon Zërin e Amerikës/ Reagimi, Basha: Fasada ra, tani koha për ta shkulur…

Pas reagimit të ashpër që Edi Rama bëri kundër Zërit të Amerikës, pas publikimit të përgjimeve të ish-drejtorit të përgjithshëm të burgjeve, Arben Çuko, kryetari i Partisë Demokratike, Lulzim Basha shprehet se për të mbrojtur paratë dhe pushtetin, kryeministri është i gatshëm të sulmojë e denigrojë këdo.

“Sulmi ndaj VOA është akt i turpshëm dhe i dëshpëruar i një të degraduari nga korrupsioni dhe lidhjet me krimin. Për të mbrojtur paratë dhe pushtetin ai është i gatshëm të sulmojë e denigrojë këdo. Fasada ra, tani është koha për ta shkulur atë dhe modelin e tij njëherë e mirë!”, thekson Lulzim Basha përmes rrjetit social  Twitter.

Ndryshe, pas raportit të Zërit të Amerikes ku thuhet se hetimet e Prokurorisë së Krimeve të Rënda për ish-drejtorin e Burgjeve, Arben Çuko ekspozojnë farsën e konkurseve publike dhe ndërhyrjet për punësime nga zyrtarë lokalë, deputetë të Partisë Socialiste dhe në një rast, edhe nga kabineti i kryeministrit Edi Rama, ky i fundit reagon ashpër duke theksuar:

“Erdhi dita që Zëri i Amerikes të flasë nga kazani i Tiranës, duke përgojuar dynjanë mbi bazë llogjesh telefonike. Për herë të parë në Shqipëri organizohet konkurs publik për punësimet në burgje dhe kazani gjëmon deri në Amerikë e jehon në katundin tonë mediatik. Çfarë katandie.”