Rama: Të vjen zor t’i thuash arabëve që s’e kemi mirë nga trutë e kokës Presidentin e Republikës!
Kryeministri Edi Rama sot në rolin e neuropsikiatrit sulmoi Presidentin e Republikës Ilir Meta dhe bashkëshorten e tij, Monika Kryemadhi duke i cilësuar si të çmendur. Këtë diagnozë bashkëshortore Edi Rama e përcaktoi në një takim me qytetarët e Tiranës duke akuzuar Presidentin e Republikës si pengesë e disa investimeve publike për qëllime politike ndërsa Kryetaren e LSI vetëm pse ishte shprehur se shkolla “Sami Frashëri” do të ndërtohet në Paskuqan
“Po thoshte Erjoni për presidentin që futet për këto historitë e punëve që nuk ka lidhje fare me të. Arrin deri aty sa të bllokojë projekt për Lanën. Ashtu siç bëri me Vlorën, një çmenduri. Si t’ia shpjegosh arabëve. Ne kishim marrë nga fondi saudit një kredi të butë për të bërë rrugën që kalon në Selenicë, e vonuam, nuk do ta harxhoj për këtë pjesë sepse ajo pjesë dilte me kosto shumë të madhe dhe ne donim të rishikonim projektin dhe ta kalonim tek rruga e Radhimës. Çfarë i duhet fondit saudit që ti nuk e investon tek Mine Peza, por tek Myslym shyri, ne donim të fillonim punën por e bllokon Ilir Meta, e kthen në politikë: juve të Selenicës po ua heq qeveria, Edi Rama, bëhet dhe mbrojtësi i komunitetit me demek atje, sepse kujtojnë se njerëzit janë budallenj që hanë këto politika. Rruga që përfshin lotin e Selenicës do të nisë shpejt, është gjetur financimi dhe do të fillojë shumë shpejt. Por kush fitoi këtu?” thekson Edi Rama si baba i moralit duke vazhduar:
“Këtu humbën ata që presin investimin dhe mbi të gjitha u bë qesharak vetë shteti, sepse të vjen zor t’i thuash arabëve që ne nuk e kemi mirë nga trutë e kokës Presidentin e Republikës,” tha Rama por nuk u ndal tek kryefamiljari Meta. Vazhdoi me bashkëshorten:
Rama: Del ajo e çmendura thotë…
Lehtësia se si i shpall të çmendur njerëzit poshtë e lartë më shumë i ngjanë një të dehuri, në rastin më të mirë me pushtet, se sa kreun e qeverisë i cili flet për ish-aleatin e tij duke i konsideruar bashkëshorten edhe të çmendur vetëm pse ishte shprehur për zhvedosjen e ndërtimit të shkollës “Sami Frashëri” duke i lënë vendin ndërtimit të pallateve.
“Po mendoja se sa shumë kohë humb në Shqipëri për gjërat që duhen bërë. Po këtu është dhe ana tjetër e medaljes sa kohë humbet për shkak të stërkëmbshave dhe një ngatërrese që është e turpshme politike. Unë nuk e di se çfarë fiton një parti politike duke vonuar projektin tek hyrja e Tiranës. Dihet se kush humb, humb komuniteti dhe humbin njerëzit që janë aty. Humbin ata që manipulohen me përralla. Del ajo e çmendura dhe thotë se shkolla ‘Sami Frashri’ do të bëhet në Paskuqan sepse do të bëhet pallat këtu. Në kohën që jetojmë, me streset që ka, me mediat që nuk filtrojnë informacionin, por dhe fuqinë që ka gënjeshtra për të bërë xhiron e botës, këto janë të tmerrshme,” tha Edi Rama duke shqetësuar qytetarët shqiptar me tonin që ashpërson sa shkon e afrohet dita e 25 Prillit.
Kur kështu e trajton çiftin bashkëshortor përmes të cilit u bë ai që është sot ndryshe do të harrohej që me humbjen në kandidimin për mandatin e dytë si kryebashkiak i Tiranës kundër avokat Spartak Ngjelës, si do të vete puna me kundërshtarin që po i merr pushtetin!
