Rama-Zelenskyy, firmoset Traktati i Miqësisë dhe Bashkëpunimit Shqipëri-Ukrainë
Kryeministri Edi Rama dhe Presidenti i Ukrainës Volodymyr Zelenskyy kanë firmosur Traktatin e Miqësisë dhe Bashkëpunimit mes Shqipërisë dhe Ukrainës, në prag të Samitit “Ukrainë – Europa Juglindore” që po zhvillohet në Tiranë.
Në fillim të ceremonisë së firmosjes së Traktati i cili i shërben konsolidimit të miqësinë mes dy vendeve dhe popujve, përmes zgjerimit dhe forcimit të bashkëpunimit në fusha të ndryshme me interes të ndërsjellë, Presidenti i Ukrainës Volodymyr Zelenskyy i dorëzoi Kryeministrit Rama Urdhërin e Princit Jaroslav i Mençuri, për kontributin e jashtëzakonshëm personal, gjithashtu edhe për mbështetjen.
Shqipëria është renditur përkrah vendeve mbështetëse të Ukrainës dhe luftës së saj të drejtë në mbrojtje të popullit ukrainas, duke u angazhuar në Këshillin e Sigurimit të OKB-së për të fituar mbështetje diplomatike për Ukrainën!
Ndonëse ky angazhim është pritur dhe përshëndetur nga kosovarët, si ti tillë deri më sot nuk është shijuar nga Kosova përkundër thirrjes shqiptarëve kudo që janë drejtuar Kryeministrit Edi Rama, i cili dita ditës ka bërë betejë të sinqertë për ta ndihmuar Serbinë në rrugëtimin e saj mes Bashkimit Europian dhe Rusisë.
Ndryshe, Kryeministri Edi Rama e ka pritur Presidentin Zelenskyy para Kryeministrisë, për të zhvilluar një takim kokë më kokë. Pasi kanë shtrënguar duart, Rama i ka uruar mirëseardhje Zelenskyyt dhe më pas, bashkë me stafin që e shoqëron presidentin ukrainas, janë futur në Kryeministri.
Me firmosjen e Traktatit, Presidenti Zelenskyy është nisur drejt Pallatit Kongreseve për të marrë pjesë në Samitin “Ukrainë – Europa Juglindore”.
