Rama zgjedh OJQ para Kuvendit/ Spaho: Të vijë ai mender-Kryeministër të mbrojë pr/ligjin për Teatrin

Kryeministri Edi Rama nuk ka shkuar ende në Kuvend, ku ka nisur seanca parlamentare, ku pritet të miratohet pr/ligji për teatrin.

Opozita kërkoi prezencën e Ramës në seancë, ndërsa Kreu i Qeverisë kishte zgjedhur të ishte I pranishëm në një aktivitet të organizuar nga një OJQ, mbi një sondazh të kryer për besueshmërinë që kanë qytetarët ndaj Policisë së Shtetit.

Duke marrë fjalën për procedurë në sallën e Kuvendit, kreu i grupit parlamentar të PD-së Edmond Spaho ka kërkuar që të ndërpritet seanca dhe të vijë Edi Rama që të mbrojë projekt-ligjin e propozuar nga ai për shembjen e Teatrit.

“Të vijë Edi Rama, ai mender kryeministër që të mbrojë projekt-ligjin që ka sjellë vetë për të prishur teatrin.

Siç e dini jashtë po bëhet një protestë kundër këtij ligji, prandaj ai duhet të vijë e të mbrojë”, tha Spaho.

Ndërkohë jashtë Kuvendit disa qindra qytetarë po protestojnë kundër draftit të qeverisë dhe kanë paralajmëruar Ramën për përshkallëzim të protestës që mund të shkojë deri në përplasje.