Raportet me Osmanin, Kurti: Kemi bashkëpunim, dallimet janë të tejkalueshme

Kryeministri i Kosovës, Albin Kurti konfirmoi sot se ka bashkëpunim të ngushtë me Presidenten Vjosa Osmani.

Duke komentuar situatën e fundit të raporteve të tij me Presidenten Osmani, Kryeministri Kurti tha se nganjëherë ka diskutime e dallime edhe me Kryetarin e Parlamentit, Glauk Konjufca, dhe ministren e Punëve të Jashtme, Donika Gërvalla, por ai nuk beson që ka dallime të patejkalueshme.

“Ne kemi bashkëpunim të ngushtë. Kjo nuk do të thotë që edhe me kryeparlamentarin Konjufca, edhe me ministren e Jashtme, Gërvalla, edhe me presidenten Osmani nuk kemi pasur diskutime, nganjëherë dallime, por unë nuk besoj që ka të tilla të cilat janë të patejkalueshme,” tha Albin Kurti ndërsa për masat ndaj Kosovës që i ka vënë Bashkimi Evropian një vit më parë dhe vonesat për heqjen e këtyre masave, sipas tij, ndërlidhen me zgjedhjet për parlamentin e ri evropian.  

“Krejt çka varet prej neve tashme ka ndodhur. Ne aso kohe u patëm ndëshkuar padrejtësisht për shkak të eskalimit të situatës në veri të Kosovës dhe ky eskalim ka pasur adresë të qartë sa i përket përgjegjëse dhe fajësisë. Ndodhi deskalimi, mirëpo më pastaj ngjau edhe rieskalimi në shtator të vitit të kaluar kur e vranë rreshterin tonë Afrim Bunjakun. Tash gjendja serish ka deskalur, a do të rieskaloj, përgjigja është në Beograd. Andaj atje duhet të behet trysnia për të pasur paqe, siguri dhe stabilitet në rajon,” tha Kryeministri i Kosovës, Albin Kurti, duke përfunduar:

“Unë besoj që heqja e këtyre masave që po vonohet  ka të bëjë më shumë me dinamikat e brendshme  të BE-së dhe sidomos me faktin që janë në fushatë zgjedhore për parlamentin e ri evropian. Uroj të ketë pjesëmarrje sa më të lartë me ç’rast ftoj mërgatën tonë që ka të drejtë vote që këtë ta bëjnë.”