RAPORTI/ Ekuador, disidentë të FARC me grupe nga Shqipëria, BeH, Mali Zi, Serbia…

Grupet disidente të Forcave të Armatosura Revolucionare të Kolumbisë, FARC, të cilat nuk ishin përfshirë në marrëveshjen paqësore me shtetin, kanë ngelur në kufi me Ekuadorin dhe bashkëpunojnë me kartelet meksikane të drogës dhe organizatat tjera evropiane, kryesisht nga Ballkani Perëndimor, që vijnë në ato zona. Këtë e thekson në raportin për vitin 2021 Zyra e Kombeve të Bashkuara për Luftën Kundër Drogës dhe Krimit, UNODC, raporton BBC Mundo.

Në raportin e UNODC, raporton BBC Mundo, thuhet se “në vitet e fundit disa grupe evropiane janë shfaqur si protagonistë të rëndësishëm në porosinë e sasisë së konsiderueshme të kokainës në Evropë, duke u bazuar dhe krijuar kontakte në Amerikën Latine”.

“Kjo në masë të madhe mund të jetë nxitur nga fragmentarizmi gjithnjë e më i madh i strukturave kriminale në Kolumbi, si pasojë e demobilizimit të FARC-EP,” thuhet në Raport.

“Shtimi i grupeve joshtetërore, të armatosura si dhe ato grupe të vogla kriminale, mosekzistimi i një organizate unike e cila kontrollon faza të ndryshme të zinxhirit të prodhimit dhe tregtisë së kokainës, si dhe ndarja gjithnjë e më e madhe e këtyre aktiviteteve, ka mundësi që kanë shkaktuar krijimin e aleancave të reja dhe zinxhirëve të furnizimit,” thekson Raporti i UNODC.    

Raporti në veçanti flet për grupe nga Shqipëria, Bosnje Hercegovina, Mali I Zi, Serbia dhe Kroacia, raporton BBC Mundo.

Ndryshe, në shtatorin e vitit 2016, FARC firmosi marrëveshjen paqësore me shtetin e Kolumbisë. Ndërkohë negociatat me Ushtrinë Nacionalçlirimtare, ELN, kanë ngecur.

FARC ka kontrolluar zinxhirët e prodhimit dhe shpërndarjes së kokainës, e demobilizimi i forcave guerile ka shkaktuar ndryshime strukturore në tregtinë e drogës, jo vetëm në Kolumbi, por edhe në Ekuador, i cili tashmë është bërë më i theksuar në hartën e tregtisë së drogës, vlerëson hulumtuesi i rrjetit latinoamerikan për analizën e sigurisë dhe krimin e organizuar, Relasedor, raporton BBC.

Brenda FARC-ut, saktësohet, kishte grupe disidente që nuk janë përfshirë në marrëveshjen paqësore.

“Këto grupe nuk respektojnë tashmë domosdoshmërisht doktrinën e FARC-ut, dhe kjo shkakton decentralizimin e llojit të vetë të biznesit të tregtisë së drogës,” thotë Rivera.

Cenimi territorial

“Pra, nuk është vetëm pjesëmarrja e FARC-ut dhe ELN-së, por edhe organizatave tjera kolumbiane, së bashku me organizatat ndërkombëtare, që sjell cenimin territorial dhe rritjen e dhunës që ka pasoja në Ekuador,” thuhet në Raport.

Ndër organizata ndërkombëtare theksohen edhe dy kartele meksikane: karteli Sinaloa, i cili sipas informacioneve të Toresas, u bë operativ në Ekuador rreth vitit 2003, dhe karteli Halisko Nueva Henerasion, CJNG.

“Në vitin 2016 kemi filluar të marrim paralajmërimet e para se CJNG në mënyrë të dhunshme po futet në Ekuador. Po fillon të bëjë aleancë me grupet disidente kolumbiane FARC dhe po fillojnë të cenojnë territoret e kartelit Sinaloa, por në mënyrë diskrete, pa u theksuar dhe luftëra të hapura,” sqaron gazetari investigativ, Arturo Tores, raporton BBC Mundo. “Në Meksiko po ndodhë e njëjta gjë: CJNG tashmë ka filluar që në mënyrë të dhunshme të kërcënoj kartelin Sinaloa dhe Los Zetas. Dhe pikërisht tani Ekuadori po bëhet pasqyra e asaj që po ndodhë në Meksiko,” saktëson Tores. ©pafrike.al