Raporti i BB dhe BERZH, Tabaku: Shqipëria e dyta në botë për korrupsion!

Pas raporteve të Bankës Botërore dhe BERZH, ka reaguar Drejtuesja Politike e Partisë Demokratike Dega 2 Tiranë, Jorida Tabaku, duke vlerësuar se Shqipëria është e dyta në botë për korrupsion dhe meqë korrupsioni është oksigjeni i kësaj mazhorance, ajo stimulon pandershmërinë dhe paligjshmërinë.

“Një shtet i kapur nga korrupsioni, që fut duart në xhepat e sipërmarrjeve dhe qytetarëve. Kjo është e vërteta e Shqipërisë që pasqyrohet edhe nga Banka Botërore dhe BERZH,” thekson Jorida Tabaku duke konstatuar:

“Të dytët në botë për korrupsionin, me zyrtarë që mbushin portofolet nga taksat e shqiptarëve dhe u heqin fitimet bizneseve të shqiptarëve. 3 herë më shumë korrupsion paguajnë bizneset shqiptare në raport me 8 vite më parë!” thekson deputetja e PD, Jorida Tabaku duke shtuar se ky nuk është as raporti i vetëm dhe as raporti i fundit ndërkombëtar që tregon natyrën e vërtetë të regjimit të korruptuar që shqiptarët kanë përballë ndërsa përfundon:

“Korrupsioni është oksigjeni i kësaj mazhorance prandaj ajo stimulon pandershmërinë dhe paligjshmërinë. Një regjim që vjedh zgjedhjet mund të ofrojë vetëm vjedhjen dhe korrupsionin si formë qeverisje!”