Raporti i DASH/ Ka edhe më Zi, Cakaj: Në vendet e rajonit shqetësimet janë më të thella sesa…

Pas Raportit të Departamentit amerikan të Shtetit, që e klasifikonte Shqipërinë si vend tranzit të drogave të forta dhe bazë e krimit, Zv/ministri për Evropën dhe Punët e Jashtme, Gent Cakaj në vend se të turpërohej dhe të kishte kujdes kur del në ballkonin e tij, pas akuzave të opozitës e me urdhër të “pahumburit”, Edi Rama, mori Raportin dhe i gjeti një fjali me të cilën edhe mund të mburrej: “Në vendet e rajonit shqetësimet janë më të thella sesa për vendin tonë.”

Mori leje nga shefi dhe në televizionin kriminal, ERTV, doli për ti fol miletit rilindas ndonëse e kishte të qartë se nga prizmi diplomatik mund të jetë e pakëshillueshme:

“Kemi rritje të bashkëpunimit ndërkombëtar, raporti thekson faktin se vendi ka arritur rezultate thelbësore në luftën kundër narkotikëve dhe krimit të organizuar për shkak të përpjekjeve për integrim në BE. Nuk kemi të bëjmë me mospërmbushje të detyrave, por angazhim e përparim drejt axhendës evropiane. Raporti afirmon se përkundër sfidave dhe vështirësive të shumta, Shqipëria është në moment pozitiv për rezultatet e marra në reformën në drejtësi, pra konfirmon se angazhimi i institucioneve të vendit në situatën aktuale nuk është zgjatim i tranzicionit disa dekadash,” tha Genti Caka dhe pandehur i doli togfjalëshi i shumëpritur me të cilin ai mburret se ka edhe më zi:

“Në vendet e rajonit shqetësimet janë më të thella sesa për vendin tonë.  Një gjuhë e ngjashme në raportet për të drejtat themelore të DASh janë edhe për vendet e BE. Kjo nuk do të thotë se po gjejmë alibi, por se trashëgimitë historike janë esenciale për të kuptuar fenomenin. Shqipëria ndryshe nuk bëhet brenda ditës. Kemi shembujt e rajonit që janë në negocim kritikohen me tone më të ashpra se kaq, edhe për shkak të paaftësisë për të adresuar problemet,” tha Zv/ministri i ministrit për Evropën dhe Punët e Jashtme, Gent Cakaj, edhe pse nuk po e kuptonte dot as veten se çfarë po thoshte, ashtu siç nuk e kuptoj por edhe tha se nuk kemi të bëjmë me konstatim krize.

“Raporti nuk është konstatim krize, por identifikim momentumi pozitiv dhe trendeve në rritje. Duhet theksuar se si mbyllet raporti, me mbështetjen e SHBA.”