Raporti i DASH, PD: U vërtetuan akuzat e opozitës, Rama kontrollon drejtësinë!
Pas Raportit të Departamentit të Shtetit ka reaguar Partia Demokratike përmes deputetit Flamur Noka duke theksuar se u vërtetuan të gjitha shqetësimet, denoncimet dhe akuzat e PD dhe të opozitës, se Edi Rama kontrollon drejtësinë, i mbështetur nga krimi dhe patronazhistët vodhi zgjedhjet e 25 Prillit.
“Vullneti i shqiptarëve është deformuar nga një qeveri që bleu votat, që përdori buxhetin e shtetit dhe sistemin kriminal të patronazhimit, duke ekspozuar mbi 900 mijë qytetarë përballë presionit politik të partise në pushtet. A është sistemi i drejtësisë i pavarur? Raporti Departamentit Amerikan te shtetit thotë Jo!” thekson anëtari i Komisionit Rithemelimit të PD, Flamur Noka.
“A është kjo qeveri e korruptuar? Raporti i Departamentit Amerikan të Shtetit thotë po. Një qeveri e korruptuar në të gjitha degët e saj, siç pohon Departamenti i Shtetit, një kryeministër i korruptuar dhe presioni politik ndaj drejtësisë është një këmbanë alarmi për shqiptarët!,” thekson Partia Demokratike duke bërë thirrje për bashkim pavarësisht bindjeve politike, për t’ia shkurtuar jetën kësaj qeverie që të drejtat e shqiptarëve i shet dhe i blen për karrigen personale të Edi Ramës.
Ndryshe, Departamenti amerikan i Shtetit thotë se çështjet kryesore lidhur me të drejtat e njeriut në Shqipëri gjatë vitit 2021 ishin problemet me pavarësinë e gjyqësorit ndërsa vazhdonte procesi i vetingut; kufizimet e lirisë së shprehjes dhe shtypit; dhe korrupsioni i përhapur në të gjitha degët e qeverisë dhe institucionet lokale.
Deklaratë:
Qeveria e Edi Ramës përbën një rrezik real për të drejtat e qytetarëve shqiptarë përmes korrupsionit masiv, presionit politik mbi drejtësinë dhe presionit ekonomik mbi median dhe blerjes së votës.
Ky është rezultati pas skanerit që Departamenti Amerikan i Shtetit i ka bërë situatës së të drejtave të njeriut në vend gjatë vitit elektoral 2021.
Raporti i DASH vërteton më së miri të gjitha shqetësimet, denoncimet dhe akuzat e Partisë Demokratike dhe të opozitës.
A ishin shqiptarët të lirë te zgjidhnin qeverinë që donin?
Departamenti i Shtetit thote Jo!
Vullneti i shqiptarëve është deformuar nga një qeveri që bleu votat, që përdori buxhetin e shtetit dhe sistemin kriminal të patronazhimit, duke ekspozuar mbi 900 mijë qytetarë përballë presionit politik të partise në pushtet.
A është sistemi i drejtësisë i pavarur?
Raporti Departamentit Amerikan te shtetit thotë Jo!
“Megjithëse kushtetuta parashikon një gjyqësor të pavarur, presioni politik, frikësimi, korrupsioni dhe burimet e kufizuara e penguan gjyqësorin të funksiononte plotësisht, në mënyrë të pavarur dhe efikase”, thekson raporti.
Shqiptarët e dinë se kush e ka fuqinë për t’i bërë presion drejtësisë. Ka një emër, që duhet të jetë në krye të listës si pengmarrës i drejtësisë së pavarur! Ky është Edi Rama.
Një nga shfaqjet më brutale të këtij presioni, Edi Rama e dha gjatë kongresit të Partisë Socialiste, kur i tregoi SPAK-ut kë duhet të hetojë dhe kush është i paprekshëm.
Partia Demokratike ka votuar për një drejtësi që t’i japë fund pandëshkueshmërisë në nivelet më të larta të qeverisë, por me Edi Ramën që kontrollon çdo pushtet, ky mision është i minuar.
A eshte kjo qeveri e korruptuar?
Raporti i Departamentit Amerikan te Shtetit thote po.
Një qeveri e korruptuar në të gjitha degët e saj, siç pohon Departamenti i Shtetit, një kryeministër i korruptuar dhe presioni politik ndaj drejtësisë është një këmbanë alarmi për shqiptarët!
Ka ardhur koha që të bëhemi bashkë, pavarësisht bindjeve politike, për t’ia shkurtuar jetën kësaj qeverie që të drejtat e shqiptarëve i shet dhe i blen për karrigen personale të Edi Ramës.
