Raporti i DASH/ Trishtim, Basha: 10 vjet në NATO, dhe Shqipëria kthehet në bazë të krimit!
Kryetari i Partisë Demokratike, Lulzim Basha, pas publikimit të Raportit të Departamentit amerikan të Shtetit tha se kemi të bëjmë me një raport që dëshmon për gjendjen e krimit, të drogës, korrupsionit e të kapjes së shtetit në Shqipëri.
Trishtimi bëhet edhe më i madh kur 10 vjet pas anëtarësimit në NATO Shqipëria kthehet në një vend bazë të krimit.
“Të shikojmë raportin e sotëm të DASH. Është një raport shkatërrimtar për Shqipërinë për gjendjen e krimit, të drogës, të pastrimit të parasë, të korrupsionit në të gjitha nivelet e qeverisjes, të kapjes së shtetit. Natyrisht me siguri kryeministrit do thotë që janë kadrinjtë e DASH që e bëjnë këtë punë, sepse nuk presim përgjigje thelbësore aq sa ka dhënë përgjigje thelbësore në ato raste të investigimit apo të ngritjes së problemeve nga media, aq presim që të japë përgjigje sot qeveria.”
DASH, tha Lulzim Basha, dëshmon se Shqipëria është kthyer në një vend ku nuk ka siguri, por lulëzon krimi, droga, pastrimi i parave, korrupsioni në të gjitha nivelet e qeverisjes dhe është kthyer nga një vend bazë sigurie për vendet e tjera, në një bazë të krimit të organizuar:
“Nuk mundem të mos e them me një trishtim të madh në zemër, 10 vite më parë në këtë javë unë isha ministër i jashtëm dhe po bëheshim gati për samitin e NATO-s ku më 7 prill përfundoi procesi i anëtarësimit si anëtar i denjë i vendit tonë në Aleancën më të fuqishme politike dhe ushtarake që ka njohur bota. Ishte qeveria amerikane aleatja jonë më e fuqishme në këtë arritje historike. Për ironi të fatit, 10 vjet më pas, pikërisht në javën e përkujtimit të kësaj ngjarjeje madhore raporti i DASH tregon se Shqipëria është kthyer në një vend ku nuk ka siguri, por lulëzon krimi, droga, pastrimi i parave, korrupsioni në të gjitha nivelet e qeverisjes dhe është kthyer nga një vend bazë sigurie për vendet e tjera, në një bazë të krimit të organizuar që vepron nga Amerika e Veriut dhe Europë deri në Lindjen e Mesme e mbyll citimin e raportit të DASH,” tha Lulzim Basha.
Ndryshe, Departamenti amerikan i Shtetit dorëzoi dje pranë Kongresit Raportin vjetor për strategjinë e luftës ndërkombëtare kundër narkotikëve ku thekson se Shqipëria është njëkohësisht burim i kanabisit dhe, gjithnjë e më shumë, një vend tranzit për kokainën dhe heroinën.
Në raport thuhet se korrupsioni në të gjitha nivelet e qeverisjes e kufizon efektivitetin e përgjithshëm të luftës kundër narkotikëve. Korrupsioni zyrtar, thekson raporti është i përhapur dhe nxit një mjedis në të cilin trafikantët e drogës janë mjaft të aftë të veprojnë pa u ndëshkuar.
Në pjesën e raportit për pastrimin e parave, Departamenti i Shtetit thotë se gjatë vititt 2018 qeveria e Shqipërisë nuk bëri përparim të rëndësishëm për parandalimin e pastrimit të parave dhe krimeve financiare. Si shkak për këtë, raporti e ve gishtin te korrupsioni, rritja e rrjeteve të krimit të organizuar dhe institucionet e dobëta ligjore dhe qeveritare. Shqipëria, thuhet në raport, shërben si bazë operacionesh për grupet e krimit të organizuar që veprojnë në Shtetet e Bashkuara, Evropë, Lindjen e Mesme dhe Amerikën e Jugut.
