Raporti i Moody’s, Tabaku: Qeveria, shkaktar i krizës ekonomike në Shqipëri!

Pas publikimit të Raportit të fundit të Agjensisë prestigjioze Moody’s ku thuhet se qeveria shqiptare është pengesë kryesore për ecurinë ekonomike të vendit, reagon Ish-Deputetja e Partisë Demokratike, Jorida Tabaku, duke theksuar se institucionet financiare ndërkombëtare sërish kanë vënë gishtin në plagët e ekonomisë shqiptare dhe kanë folur më haptas se kurrë për shkaqet dhe shkaktarët e krizës së thellë ekonomike në Shqipëri.

“Ekonomia shqiptare konsiderohet me risqe të larta. Në raport kritikohet mungesa e vullnetit të qeverisë për të luftuar krimin e organizuar. Vëmendje të veçantë kanë tërhequr edhe borxhi i lartë dhe PPP-të të cilat shndërruar në bomba me sahat për vendin,” thekson në reagimin e saj përmes rrjetit social Facebook, Jorida Tabaku, duke vlerësuar se kjo qeveri punon për një pakicë dhe kundër interesave të shumicës së shqiptarëve.

“Ajo është shndërruar në pengesë për zhvillimin e ekonomisë dhe biznesit. Ky kryeministër dhe një grusht përfituesish rreth tij që e çuan vendin në këtë krizë të thellë për qytetarët dhe biznesin, nuk e duan ndryshimin dhe po orvaten me çdo mjet për të ndalur zgjidhjen,” konstaton Ish-Deputetja e Partisë Demokratike duke saktësuar se ata kanë ndërtuar një sistem që çdo ditë madje edhe gjatë karantinës vodhën parátë nga xhepat e shqiptarëve dhe u sollën si banda me biznesin e ndershëm, ndërkohë që duan të amnistojnë paratë e krimit.

“Këto janë përpëlitjet e fundit të një kryeministri dhe një qeverie në ikje. Ne nuk do të lejojmë që ekonomia të rrënohet në mënyrë të pakthyeshme dhe që Shqipërisë ti nxihet faqja në çdo raport ndërkombëtar,” vlerëson Ish-Deputetja e Partisë Demokratike, Jorida Tabaku, duke përfunduar:

“Rrotacioni është zgjidhja dhe ndryshimi që po vjen është i pandalshëm. Ekonomia shqiptare do të çlirohet nga ky makth. Shqiptarët meritojnë më mirë!”