Raporti i Progresit KE, Varhelyi: Shqipëria është shumë afër plotësimit të kushteve për Konferencën e parë ndërqeveritare

Gjatë prezantimit të Raportit të Progresit për Ballkanin Perëndimor, Komisioneri për Zgjerimin pranë BE-së, Oliver Varhelyi, tha se Shqipëria ka bërë një progres të madh dhe është shumë afër plotësimit të kushteve për arritjen e realizimit të të qenit pjesë në Konferencën e parë ndërqeveritare ndërsa për Reformën Zgjedhore, shpreson që ndryshimet në Kodin Zgjedhor të mos jenë një gabim.  

“Shqipëria ka ndjekur me insistim rrugën e reformave dhe autoritetet shqiptare vazhdojnë të tregojnë se janë të përkushtuara në realizimin e tyre. Shqipëria ka bërë një progres të madh dhe është shumë afër plotësimit të kushteve për arritjen e realizimit të të qenit pjesë në Konferencën e parë ndërqeveritare. Është shënuar një progres i jashtëzakonshëm me Reformën elektorale me Marrëveshjen e Nënshkruar me 5 Qershor dhe implementimin e rekomandimeve të OSBE –ODIHR. Po vazhdohet me implementimin e reformës në Drejtësi, po ashtu po vazhdon edhe Lufta kundër krimit të organizuar. Janë bërë përpjekje të jashtëzakonshme në vendosjen e rendit dhe sundimit të ligjit,” tha Komisioneri për Zgjerim duke shtuar se Shqipëria duhet të vazhdojë me reformat e saj edhe në periudhën para zgjedhore ndërsa për Kodi Zgjedhor BE vetëm shpreson.

“Sa i përket Kodit Zgjedhor po e ndjekim me vëmendje dhe shpresojmë që kjo çështje të mos jetë gabim. Kemi punuar për arritjen e një marrëveshje. Kam folur me të gjithë në veçanti me kryeministrin, por ne sërish do të jemi vigjilentë. Do shkoj ta shikoj vetë punën në terren.”

Për pikat me problematike, Gjykatën Kushtetuese e cila vazhdon të jetë jo funksionale dhe klimën e polarizuar politike, Komisioneri për Zgjerimin kërkoi të ecet me ritme të shpejta.

“Me katër anëtarët aktualë, Gjykata ka kuorumin minimal për të gjykuar mbi pranueshmërinë e çështjeve. Procesi i përzgjedhjes për tre poste të lira është duke vazhduar. Procesi është prekur pak nga kriza COVID-19, por pritet të finalizohet si përparësi. Përfundimi i emërimeve në Gjykatën Kushtetuese do të vazhdojë pasi Gjykata e Lartë të arrijë kuorumin e kërkuar prej tre të pestave të anëtarëve në detyrë, pasi kjo e fundit është autoriteti i tretë emërues së bashku me Asamblenë dhe Presidentin e Republikës”, tha ai

Ndëraa gjatë prezantimit të Paketës së Zgjerimit të BE-së 2020 dhe Planin e Investimeve Ekonomike për Ballkanin Perëndimor, Varhelyei bën me dije se BE do të mobilizohet që të realizojë deri në 9 miliardë euro financim për sektorët kryesorë të investimeve, duke shtuar gjithashtu se plani ofron një rrugë për një integrim të suksesshëm ekonomik rajonal, për të ndihmuar përshpejtimin e procesit të integrimit BE.

“Sot ne paraqesim planin Ekonomik dhe të Investimeve për Ballkanin Perëndimor për të rritur zhvillimin ekonomik dhe rimëkëmbjen e rajonit. Ne do të mobilizojmë deri në 9 miliardë euro financim për sektorët kryesorë të investimeve në transport, energji, tranzicion të gjelbër dhe dixhital, për të krijuar rritje të qëndrueshme dhe vende pune,” tha Komisioneri për Zgjerimin duke folur për ambicie që shkojnë deri 20 miliardë euro:

“Kapaciteti investues i rajonit duhet të rritet duke mobilizuar një lehtësim të ri të Garancisë së Ballkanit Perëndimor, ambicie për të rritur potencialisht investime deri në 20 miliardë €. Plani do të rrisë grantet në krahasim me huatë, pasi hapësira fiskale e rajonit është e kufizuar.

Plani gjithashtu ofron një rrugë për një integrim të suksesshëm ekonomik rajonal për të ndihmuar përshpejtimin e afrimit të procesit të integrimit BE. Ky plan duhet të ndihmojë për të transformuar Ballkanin Perëndimor në një nga rajonet më tërheqëse për investime në botë.”

Ndryshe, nesër Komisioneri për Zgjerimin pranë BE-së, Oliver Varhelyi, do të vizitojë Tiranën ku pritet ti drejtohet deputetëve të Parlamentit të Shqipërisë.

Përmes rrjetit social Twitter, Ambasadori i BE-së në Tiranë, Luigi Soreca, ka bërë të ditur se Komisioneri për Zgjerimin pranë BE-së dontë takohet me Presidentin Ilir Meta, Kryeministrin Edi Rama, Kryetarin e PD, Lulzim Basha. dhe drejtuesit e organeve të vettingut.