Raporti Vjetor i Drogave: Në Shqipëri, përdorimi më i lartë i kokainës në botë

Shqipëria, së bashku me Australinë janë dy vendet që kanë përdorimin më të lartë të kokainës në botë. Ky është rezultati nga të dhënat e përditësuara në Raportin Vjetor të Drogave 2018, të publikuar së fundmi nga Kombet e Bashkuara, që i referohet kryesisht të dhënave të vitit 2016.

Vendi ynë ka një prevalencë të përdorimit të kokainës prej 2.5 për qind, për grupmoshën midis 15 dhe 64 vjeç (prevalenca nënkupton që një individ e ka përdorur kokainën të paktën një herë gjatë jetës). Të dhënat janë marrë nga Instituti i Shëndetit Publik dhe pyetësorët e Raportit Vjetor, AQR.

Ndryshe nga renditja e vitit të kaluar, kur Shqipëria kryesonte e vetme, këtë vit në të njëjtin nivel me ne është dhe përdorimi i kokainës në Australi (në raportin e një viti më parë Australia e kishte prevalencën 2.1 për qind). Më pas renditen Shtetet e Bashkuara të Amerikës (2.4) dhe Mbretëria e Bashkuar (2.3). Kolumbia, ndonëse një nga prodhuesit kryesorë në botë, ka një prevalencë më të ulët sesa 1 për qind.

Në rajon, përdorimi i kokainës është shumë më i ulët. Bosnja e ka prevalencën 0.63 për qind,  Kroacia 0.8 për qind, në Mal të Zi arrin në 0.6 për qind, në Serbi vetëm 0.1 për qind dhe në Maqedoni maksimumi 0.65 për qind.

Ndryshe nga kokaina, shqiptarët nuk “shquhen” për konsum të kanabisit. Prevalenca e përdorimit të kësaj bime, që të paktën në 2016-n u kultivua masivisht tek ne, ishte 5.6 për qind për grupmoshën midis 15 dhe 65 vjeç. Në botë, rekordin për përdorimin e kanabisit e mban Izraeli, me një prevalencë prej 27 për qind. Më pas vijnë SHBA me 17 për qind, Kili me 15 për qind.

Përdoruesi më i madh i kanabisit në rajon është Kroacia me 7.9 për qind, Mali i Zi e ka prevalencën maksimumi 2.5 për qind, Bosnja, maksimumi 3 për qind, Serbia 1.6 për qind, Maqedonia 1.58 për qind. Në Itali ky tregues është 9.2 për qind.

Shqipëria ka një përdorim të lartë edhe të qetësuesve dhe sedativëve, me prevalencë prej 8.5 për qind, sipas të dhënave në raport, ndërsa mesatarja pjesës më të madhe të shteteve është nën 5 për qind. Gjithsesi, rekordin në rajon e mban Kroacia, me 17.3 për qind, ndërsa në botë kryeson Çekia me 19.5 për qind.

Raporti Vjetor i Drogave 2018 e rendit Shqipërinë, si një ndër vendet më të përmendura për trafikun ndërkombëtar të barit të kanabisit, së bashku me Holandën të ndjekura në distancë nga Çekia, sipas raportit vjetor të Drogave 2018, të sapopublikuar nga Zyra e Kombeve të Bashkuara për Drogën dhe Krimet, UNODC.

Ndërsa në hartën globale, Shqipëria është e përfshirë në rrugën e trafikimit të heroinës nga Azia, me origjinë nga Afganistani, që kalon përmes Turqisë dhe më pas i drejtohen Europës Perëndimore. Bullgaria është një tjetër shtet që përfshihet në këtë gjurmë./Monitor/