Raportuesi i PE për Serbinë: BE po e trajton Serbinë si Merkel – Rusinë. E dimë si përfundoi!
Raportuesi i Parlamentit Evropian për Serbinë, Tonino Picula, kritikoi politikën e stabilokracisë ndaj Ballkanit Perëndimor, duke theksuar se BE shpeshherë i ka dhënë përparësi stabilitetit në vend të forcimit të institucioneve demokratike.
“Bashkimi Evropian ka qenë shumë zemërgjerë dhe shumë bujare ndaj vendeve të Ballkanit Perëndimor, veçanërisht ndaj Serbisë, duke dhënë shuma të mëdha fondesh, por ne kemi ndarë shumë pak fonde për forcimin e institucioneve demokratike,” eurodeputeti kroat në një intervistë për Radion Kroate duke shtuar se krijuesit e politikave të tilla shpeshherë ishin “priftërinjë të stabilokracisë”.
“Prioriteti ishte stabiliteti, jo demokracia”
Tonino Picula e përshkroi stabilokracinë si një qasje të BE-së që i jepte përparësi stabilitetit rajonal përmes mbështetjes bujare financiare, ndërsa forcimi i institucioneve demokratike ishte më pak i fokusuar.
Ai kritikoi politikat e bazuara në besim, ngjashëm me atë që Angela Merkel aplikoi për Rusinë, se tregtia dhe shkëmbimi në vetvete do të çojnë në demokratizim.
“Ne e dimë se si përfundoi me Rusinë dhe diçka e ngjashme ndodhi në Ballkanin Perëndimor,” shtoi eurodeputeti kroat, duke theksuar se një politikë e tillë duhet të ndalet dhe të vendoset një kushtëzim më i rreptë.
“Duhet të keni bashkëbisedues që do ta respektojnë BE-në si një komunitet vlerash, jo vetëm si një bankomat,” tha Picula, i cili pas një vizite treditore në Serbi, ku ai, si raportues i Parlamentit Evropian për Serbinë, foli me përfaqësues të qeverisë, opozitës, mediave, OJQ-ve, biznesit dhe grupeve të ekspertëve, vlerëson se askush nuk ka një përgjigje të qartë për pyetjen se si të zgjidhet kriza aktuale në Serbi.
“Kjo është një përgjigje unike ndaj polarizimit të thellë të shtetit që lind për shkak të natyrës së këtij regjimi autoritar,” tha Picula duke shtuar:
“Është e qartë se ndryshimi nuk mund të ndodhë me mjete institucionale. Është e diskutueshme nëse zgjedhjet në Serbi mund të mbahen sipas standardeve demokratike”
Sipas Raportuesit të PE për Serbinë, protestat e studentëve që janë shndërruar në një lëvizje masive civile po kërkojnë një lloj të ri emancipimi shoqëror, por organizatorët po refuzojnë kontaktet me opozitën institucionale dhe autoritetet, gjë që e bën të vështirë artikulimin politik të kërkesave të tyre.
“Ata nuk po dalin me kërkesa që do të verifikoheshin përmes procedurave standarde demokratike,” tha ai, duke theksuar se është e diskutueshme nëse në Serbi mund të mbahen zgjedhje sipas standardeve demokratike.
Duke folur për pozicionin ndërkombëtar të presidentit Aleksandar Vuçiç, Picula vlerëson se politika e jashtme “multivektore” e Vuçiçit për balancimin mes BE-së, Rusisë dhe Kinës është trashëguar kryesisht nga Boris Tadiç.
Marrëdhëniet e çrregulluara mes këtyre vektorëve e bëjnë të vështirë një politikë të tillë, përfundoi Raportuesi i Parlamentit Evropian për Serbinë, Tonino Picula, duke kujtuar shembullin e fundit të votimit të rezolutës për Ukrainën në OKB, kur Serbia votoi si shumica dërrmuese e vendeve të BE-së, vetëm që lidershipi shtetëror të distancohej më vonë prej saj.
