Reagimi, Vuçiç: Nuk është e vërtetë, nuk e kemi ditur për aksionin në Veri

Presidenti i Serbisë, Aleksandar Vuçiç, tha se përfaqësuesit e bashkësisë ndërkombëtare në Kosovë “nuk flasin të vërtetën” kur thonë se autoritetet në Beograd kanë qenë në dijeni për operacionin e Policisë së Kosovës në veri të Kosovës dhe se një gjë e tillë është lehtë të verifikohet.

Vuçiq tha se ka pasur disa kontakte dje, në ditën e operacionit, pas orës 11:30, por se nuk ka pasur të tilla “kur ka nisur kriza dhe kur ishte në kulm”, raporton RFE pas deklaratës të KFOR-it.

Ai tha se pala serbe e ka ditur nga burimet informative se po përgatitet diçka dhe se ai ka folur për këtë publikisht para më shumë se dhjetë ditësh.

“I kemi njoftuar. Që nga 17 maji kemi kërkuar nga ta që të mos e bëjnë një gjë të tillë. Kur kanë thënë se iu duhet për shkak të luftës kundër korrupsionit, atëherë njerëzit tanë në Zyrën për Kosovën kanë kërkuar që të mos futen në veri, por t’iu dërgojnë thirrje të të dyshuarve. Është e rëndësishme të shohim se kë e kanë informuar para 17 majit”, tha Vuçiç.

Ndryshe, sot zëdhënësi i misionit paqeruajtës të NATO-s në Kosovë, Vincenso Grasso, konfirmoi për RFE se autoritetet serbe kane qenë të njoftuara për aksionin në veri të Policisë së Kosovës që është zhvilluar më 28 maj.

Aksioni ka rezultuar me arrestimin e disa personave të dyshuar për përfshirje në krim të organizuar dhe kontrabandë.

Operacioni policor është zhilluar në disa rajone, përfshirë komunat Zveçan, Zubin Potok, Leposaviq, Mitrovicë e Veriut, Mitrovicë e Jugut, Skënderaj dhe Drenas.

Ndërkohë Vuçiç ka urdhëruar Forcat Serbe të Sigurisë në gjendje gatishmërie për luftë.