Reduktim dhe anulim të 7 taksave vendore, Këlliçi: Përfitojnë 54 mijë biznese!
Kandidati i Koalicionit “Bashkë Fitojmë” për kryetarin e Bashkisë Tiranë, Belind Këlliçi, sot para përfaqësuesve të biznesit të mesëm dhe të vogël, duke prezantuar platformën për taksat vendore tha se janë pikërisht këto sipërmarrje që kanë mbajtur gjallë ekonominë e qytetit, por që janë trajtuar me armiqësi nga Bashkia dhe Erjon Veliaj. Për të lehtësuar biznesin, Belind Këlliçi prezantoi 7 taksat të cilat do të reduktohen ose anulohen sapo ai të vij në drejtimin e Bashkisë Tiranë me fitoren e 14 majit.
“Taksa për infrastrukturën mësimore, bëhet zero. Taksa e fjetjes në hotel, ulet me 30%. Taksa e tabelës, ulet me 30%. Taksa e truallit reduktohet me 30%. Taksa mbi ndërtesën ulet me 30%. Reduktim me 50% të tarifës së pastrimit dhe hapësirës. Taksa e tokës bujqësore, pjesa e Bashkisë, hiqet,” tha Këlliçi duke sqaruar se qasja e tij ka të bëjë me lehtësimin e barrës që ata kanë sot, gjë që do të ndikojë që biznesi i vogël dhe i mesëm të gjallërohen, t’i japin impuls ekonomisë e të krijojnë vende të reja pune ndërsa saktësoi:
“Janë mbi 41 mijë biznese të vogla dhe të mesme do të përfitojnë drejtpërdrejtë nga ky reduktim. Në fund të ditës të do të përfitojnë të gjithë, 54 mijë bizneset e Tiranës, madje, sado paradoksale të duket, edhe Bashkia e Tiranës.”
Por sa do të përfitojnë qytetarët dhe bizneset nga heqja e këtyre taksave? Eksperti dhe njëri ndër hartuesit e këtij programi, Klodian Muço, tha se biznesit do t`i kursehen së paku 420 mijë lekë të reja në vit nga heqja e këtyre taksave.
“Ulja e tarifave që konsiderohet se në 7 vitet e fundit janë rritur deri në katër herë. Çuditërisht edhe pse këto tarifa janë rritur, të ardhura kanë ardhur duke u ulur. Kjo nënkupton se ka abuzim, se inspektorët tatimorë të bashkisë Tiranë punojnë keq. Administrata tatimore e bashkisë Tiranë është 4.3 herë më pak inefiçente se administrata tatimore e përgjithshme. Pra nga ulja nga e tarifave, do përfitoni deri në 420 mijë lekë në vit. Premtimi i biletës falas, ka shumë prej jush që kanë të punësuar kameriere, apo punëtorë që ndërrojnë deri në dy autobusë në ditë, ku qytetarëve do u kursehet deri në 80 mijë lekë të vjetra në muaj,” tha Klodian Muço.
Kryesuesi i listës për Këshillin Bashkiak të Tiranës i këtij Koalicioni, Ilir Alimehmeti, tregoi me shembuj sesi taksat e vendosura nga Erion Veliaj për biznesin, nuk janë përkthyer në investime për interes publik ndërsa rikujtoi se vetëm nga taksa e infrastrukturës arsimore, Bashkia Tiranë ka arkëtuar mbi 41 milionë euro, por fëmijët vijojnë të bëjnë mësim me turne.
“Ajo që ju nuk dini është se deri tani kemi paguar 41 milionë euro i keni paguar. Por fëmijët tonë, shumica dërrmuese, janë me dy turne. Pra edhe këto që kemi paguar në mënyrë antikushtetuese, nuk janë përkthyer në mundësi që fëmijët tanë të kenë ato shkolla që duhet të kishin. Veç kësaj ka një VKB, që e ka shtyrë dhe tre vite të tjera këtë taksë të përkohshme. Për tre vite të tjera do na marrin dhe 21 milionë euro,” tha doktor Ilir Alimehmeti.
Duke përshëndetur paketën e propozuar nga kandidati i opozitës, përfaqësuesit e Biznesit shprehën edhe disa nga shqetësimet që kanë hasur gjatë drejtimit të bashkisë së Tiranës nga Erion Veliaj. Kryetari i Shoqatës së Biznesit të Vogël dhe të Mesëm, Albert Nasto, gjatë tryezës kërkoi që të nënshkruhet një memorandum bashkëpunimi mes kreut të ardhshëm të bashkisë dhe biznesit, pasi sipas tij, deri më tani është goditur klima e biznesit.
“Ne duam që z.Këlliçi, të cilin e njoh shumë mirë, duhet të kemi një klimë të mirë, që ta shtojmë biznesin. Jemi në pikën e fundit, në një klimë kaq të acaruar për biznesin. Të firmosim një memorandum bashkëpunimi mes shoqatës dhe kryetarit të bashkisë së ardhshëm. Jemi të gatshëm të firmosim dhe ju falënderoj shumë për këtë tryezë,” tha Albert Nasto ndërsa Belind Këlliçi shtoi se memorandumi do të nënshkruhet në fillim të nisjes zyrtare të fushatës elektorale.
Në fund, me uljen e taksave, tha Belind Këlliçi, synon rritjen e arkëtimet në bashki, për shkak se do të ulet informaliteti dhe biznesi do të nisë të paguajë taksat.
Bashkia, tha kandidati i koalicionit “Bashkë Fitojmë” për Kryetarin e Bashkisë Tiranë, Belind Këlliçi, synon të arkëtojë 65 milionë euro më shumë nga paketa e re fiskale, të cilat do të shkojnë në mbështetje të prioriteteve të bashkisë, siç është transporti publik falas.
Këto janë dhe ndryshimet në reduktimin dhe anulimin e taksave:
– Taksa për infrastrukturën mësimore bëhet ZERO
– Taksa e fjetjes në hotel, ULET me 30%
– Taksa e tabelës ULET me 30%
– Taksa e truallit ULET me 30%
– Taksa mbi ndërtesën ULET me 30%
– ULET 50% e tarifës së pastrimit dhe hapësirës
– HIQET taksa bashkiake e tokës bujqësore
