Referendumi në Maqedoni/ Mbyllen vendvotimet , numër i vogël i pjesëmarrjes

Tashmë janë mbyllur të gjitha vendvotimet në Maqedoni me rastin e referendumit për ndryshimin e emrit dhe anëtarësimin në NATO dhe BE dhe pritet zyrtarizimi i numrit të pjesëmarrjes që aktualisht raportohet shumë i ulët.

Mediat në Maqedoni raportojnë se numri i pjesëmarrjes ishte rreth 35 për qind e qytetarëve me të drejtë vote.

Ndërkohë një grup i qytetarëve maqedonë që e kanë bojkotuar referendumin janë mbledhur para Kuvendit duke brohoritur emrin e presidentit Gjorgje Ivanov, i cili e ka refuzuar referendumin, dhe kërkojnë dorëheqjen e Qeverisë. Është vendosur një tribuinë dhe pritet të mbahen fjalime, në mesin e të cilëve edhe klerikët fetarë.

Pas mbylljes së vendvotimeve, kryeministri Zoran Zaev në paraqitjen e tij të parë falemnderoj qytetarët dhe tha se nëse nuk arrihet qëllimi i Referendumit nuk e përjashton mundësinë e zgjedhjeve të jashtëzakonshme.